әрдоған қуруқлуқ һәрикитидин бешарәт бәрди

түркийә авази радийоси хәвири:  җумһур рәис рәҗәп таййип әрдоған қатар зийаритидини ахирлаштуруп қайтиш сәпиридә, айропиланда күнтәртипкә мумасивәтлик мәсилиләр үстидә тохталди.

у ирақ билән сүрийәниң шималида елип берилған «пәнчә-қилич һава һәрикити» үстидә тохтилип: «һәр даим дегинимдәк, <бир кечә уштумтут бастуруп баримиз> дегән гәпни бикарға демәймиз. мана күткән, пилан қилған вақит йетип кәлгән һаман бу қәдәмләрни бастуқ. түнүгүн кечә әмәлгә ашурулған һәрбий һәрикәт буниң толуқ испати» деди.

у «пәнчә-қилич һава һәрикити» ниң һава һәрикити биләнла чәклинип қалмайдиғанлиқини тәкитләп: «мудапиә министирлиқимиз вә армийә қоманданлиқ иштабимиз бирликтә қарар қилиду. музакирәләрдин кейин, шуниңға қарита қәдәм ташлаймиз» деди.

у мәзкур һәрбий һәрикәт тоғрисида америка пирезиденти җо байдин вә русийә пирезиденти владимир путин билән көрүшмигәнликини әскәртип, мундақ деди:

«әмма, бизниң мәзкур районда бу хил һәрбий һәрикәтләрни қилалайдиғанлиқимизни пирезидент байдин вә путин билиду. биз һәр даим <бир кечә уштумтут бастуруп баримиз> дәп келиватимиз. биз бирсидин иҗазәт алмаймиз. бир ишни қилмақчи болсақ, қарар қилимиз вә шу бойичә қилимиз. буниңда америка бизни билиши керәк. бәлким билиши мумкин. иншааллаһ буниңдин кейинки мусапидә, техиму чоң қәдәмләрни қәтийлик билән қандақ ташлайдиғанлиқмизни һәм ташлишимиз керәкликини һәммиси көриду.»