erdoghan bilen putin téléfonlashti
jumhur reis rejep tayyip erdoghan rusiye pirézidénti wiladimir putin bilen téléfonlashti.
türkiye awazi radiyosi xewiri: türkiye jumhuriyiti jumhur reislik mehkimisi uchur – alaqe ishliri idarisi bayanat élan qilip, jumhur reis erdoghan bilen pirézidént putinning téléfonliship, türkiye – rusiye munasiwiti, ashliq karidori kélishimige munasiwetlik özgirishler we rayon mesililiri toghrisida sözleshkenlikini, erdoghanning, putinning ashliq ékisporti toghrisidiki istanbul kélishimining mudditini 120 kün uzartish mesilisige tutqan ijabiy pozitsiyisige rehmet éytqanliqini uqturdi.
jumhur reis erdoghan, 24-féwraldin buyan dawam qiliwatqan rusiye - ukraina urushining uzirap kétishining xewplerni éghirlashturuwétidighanliqini, shunga diplomatik söhbetni eslige keltürüshning zörürlükini otturigha qoyup, rusiye we amérika istixbarat (dölet bixeterlik) idarisi diréktorlirining türkiyediki uchrishishining jeng meydanidiki küntrolsiz jiddiychilikning aldini élish jehette achquchluq rol oynighanliqini tekitlidi.
putinning türkiyede tebiiy gaz merkizi qurush teklipidin söyüngenlikini bildürgen jumhur reis erdoghan, ortaq nishangha baldurraq yétish üchün, munasiwetlik xadimlarning zörür bolghan téxnikiliq, qanuniy we soda xaraktérlik muhakimilerni yürgüzidighanliqini bildürdi.
jumhur reis erdoghan yene, istanbuldiki térrorluq hujumi seweblik türkiyedin hal sorighan pirézidént putingha rehmet éytti.
