erdoghan: rusiyening xérsondin chékinishi ijabiy qedem

türkiye awazi radiyosi xewiri: jumhur reis rejep tayyipb erdoghan türk döletliri teshkilatlirining 9-nöwetlik rehberler yighinigha qatnishish üchün özbékstangha qarap yolgha chiqishtin ilgiri enqere esenbogha ayrodurumida axbarat élan qilish yighini ötküzdi.

u 24-féwraldin (2022) tartip dawamlishiwatqan ukraina-rusiye urushi toghrisida toxtilip, türkiyening muressechilik xizmetlirini üzüksiz dawamlashturghanliqini bildürdi.

u: «urushning qachan axirlishidighanilqigha bir nerse déyish tes. emma, rusiyening xérsondin chékinish qarari ijabiy we muhim qarar hésablinidu. G-20 yighinigha rusiyening qatnishishini ümid qilimen. undaq bolmighanda, rusiye bilen téléfon diplomatiyesini dawamlashturimiz. muweppeqiyetlik halda muressechilik qilishni xalaymiz. urush hökümran boluwatqan dunyadin tinchliq hökümran dunya berpa qilayli» dédi.

u erméniye toghrisida toxtilip, yéqinqi künlerde erméniye rehberliri bilen chéxiyede körüshkenliklirini we ulargha, «eger ezerbeyjan bilen munasiwetlerni ijabiy dawamlashtursanglar, türkiye bolush süpitimiz bilen bizmu erméniye bilen bolghan munasiwetlirimizni ijabiy yölünüshte dawamlashturimiz. biz silerdin buni kütimiz, déduq» dégenlikini bildürdi.

u erménye diyasporasining firansiye bolsun yaki amérikada bolsun türkiyege qarshi paaliyet qiliwatqanliqini, buning munasiwetlerge selbiy tesir qiliwatqanliqini bildürüp: «biz düshmen köpeytish emes, belki dost köpeytish üchün tirishiwatimiz. erméniye hökümitimu bu toghrida muweppeqiyet qazansa, lachin we zengezurda ezerbeyjan bilen basidighan qedemliri, bizning qedimimizge ijabiy tesir qilidu» dédi.