bartindiki partlashta 40 adem qaza qildi
bartinning amasra nahiyesidiki bir kanda partlash yüz bérip, 40 ishchi qaza qildi.
türkiye awazi radiyosi xewiri: türkiye tashkömür orgini qarmiqidiki bir kanning bir bölümide tünügün kech saet 18 din 15 minut ötkende partlash yüz berdi؛ partlashtin kéyin rayongha derhal köp sanda sehiye, ot öchürüsh we izdesh - qutquzush etriti xadimliri ewetildi.
weqedin kéyin neq meydangha yétip barghan ichki ishlar ministiri süleyman soylu, partlashta 40 kishining qaza qilghanliqini, partlash yüz bergende kanda qalghan 110 ishchining 58 ining qutquzulghanliqini, yarilanghan 11 ishchining doxturxanida dawaliniwatqanliqini bildürüp: «bir kanchimizgha munasiwetlik éniqsizliqlar bar. bu kanchimizni izdesh xizmetliri dawamlishiwatidu» dédi.
ministir soylu bilen birlikte rayongha yétip barghan énérgiye we tebiiy bayliqlar ministiri fatih dönmez bolsa, deslepki mulahizilerning, kandiki partlashni gaz siqiship qélish hadisisining keltürüp chiqarghanliqigha isharet qilghanliqini, kandiki ot apitining körünerlik derijide tizginlengenlikini bildürdi.
weqeni tekshürüsh xizmetliri bashlandi.
bügünki barliq orunlashturushlirini emeldin qaldurghan jumhur reis rejep tayyip erdoghan bartingha bérip, neq meydandiki izdesh - qutquzush xizmetlirini maslashturidu.
jumhur reis erdoghan ijtimaiy alaqe supisidiki adrésida uchur hembehrilep: «men bartinimizning amasra nahiyesidiki kömür kénida meydangha kelgen partlashta hayatidin ayrilghan qérindashlirimizgha allahtin rehim – shepqet, tughqanlirigha sewr, yarilanghan qérindashlirimning salametlikining tézrek eslige kélishini tileymen» dégenlerni qeyt qildi.
barliq organlarning izdesh – qutquzushni öz ichige alghan partlashqa munasiwetlik xizmetlerni estayidilliq bilen dawamlashturuwatqanliqini bildürgen erdoghan, özining yolyuruqigha asasen, üch ministirning neq meydandiki xizmetlerni nazaret qilish üchün rayongha yétip barghanliqini eskertti.
u sözini dawamlashturup: «hayatidin ayrilghan kanchi qérindashlirimizning aililiri, perzentliri bizge amanettur. ölüp ketkenlerning ornini tolduralmisaqmu, ularni qayturup kélelmisekmu, kichikkine heqsizlikke yol qoymaymiz, ularning aililirining halidin xewer alimiz» dédi.
jumhur reis erdoghan, qanun organlirining barliq kishilerning yürek baghrini puchulidighan bu échinishliq hadisini her jehettin tekshüridighanliqini, kichikkine biperwaliq bolsa, uning hésabining élinidighanliqini tekitlidi.
