türkiye bilen ukrainaning birinchi xanimliri istanbulda körüshti

türkiye awazi radiyosi xewiri: rejep tayyip erdoghanning repiqisi emine erdoghan ukraina pirézidénti wolodimir zélénskiyning repiqisi oléna zélénska bilen istanbuldiki wahdettin sariyida körüshti.

oléna zélénska körüshüshte, ukrainaning nöwettiki weziyiti we özining ismi bilen qurulghan wexpening xizmetliri toghrisida melumat berdi.

u yoldishi wolodimir zélénskiyning ukrainani qollighanliqi sewebidin ewetken teshekkür mektubini emine erdoghangha tapshurdi.

u türkiyening ailisi bolmighan 1300 ukrainaliq baligha sahibxanliq qilwatqanliqidin intayin xursen ikenliklirini bildürüp, alahide éhtiyajliq bolghan texminen yene 200 balini türkiyege ekilish toghrisida yardem telep qildi.

u jumhur reis rejep tayyip erdoghanning küchlük rehberliki we diplomatik iqtidari bilen ashliq karidori, hemde rusiye bilen esir almashturush ishlirining emelge ashurulghanliqini eskertti. bolupmu, ashliq karidorining dunyani chong yémek-ichmek kirizisidin qutquzup qalghanliqini qeyt qildi.

u urush sewebidin sehiye sahesidiki éhtiyajlarning köpeygenlikini bildürüp, qutquzush mashinisi we inkubator bilen teminlesh üchün emine erdoghanning qollishini telep qildi.

emine erdoghan twittérda uchur hembehirlep: «ukraina pirézidéntining repiqisi qimmetlik dostum oléna zélénska xanimni istanbulda kütüwalghanliqimdin xushalliq hés qildim. urushning ziyankeshlikige uchrighan bigunah ayallar we balilar, hemde pütkül ukraina xelqining yarisigha birlikte melhem bolidighanliqimizgha ishinimen. türkiye her daimqidek tinchliq ornitish üchün diplomatik kürishini her sahe boyiche dawamlashturidu» dédi.