әрдоған түркийә бүйүк милләт мәҗлисиниң «йеңи қанун чиқириш йили» ечилиш мурасимида сөз қилди

җумһур рәис рәҗәп таййип әрдоған, америка қошма иштатлириниң җәнубий қибрис рум даирилиригә қаритилған қорал ембаргосини бикар қилиш қарариға «қобул қилғили болмайдиған қарар» дәп баһа бәрди.

1887179
әрдоған түркийә бүйүк милләт мәҗлисиниң «йеңи қанун чиқириш йили» ечилиш мурасимида сөз қилди

түркийә авази радийоси хәвири: җумһур рәис әрдоған түркийә бүйүк миллий мәҗлиси (TBMM)ниң йеңи қанун чиқириш йилиниң ечилиш мурасимидики сөзидә: «бүгүн биз 27-нөвәтлик мәҗлисимизниң ахирқи қанун чиқириш йилиниң ечилишини қиливатимиз. мән, мәҗлисимиз сайлам калиндариға асасән хизмитини давамлаштуруп, нурғун һалқилиқ бәлгилимиләрни йолға қойуп, бу қанун чиқириш йилидинму әң йахши шәкилдә пайдилинидиғанлиқиға ишинимән» деди.

у терроризмға қарши күрәш һәққидики сөзидә, террорчилар садир қилишқа урунуватқан анда – санда қилмишларға «хаинларниң ахирқи типирлашлири» дәп баһа берип, түркийә бихәтәрлик қисимлириниң қолиниң һәр даим террорчиларниң гәҗкисидә икәнликини ейтти.

җумһур рәис әрдоған йеқинқи йиллардин буйан қолға кәлтүрүлгән иқтисадий ешиш тоғрисида тохтилип: «сетивелиш күчи көрсәткүчигә асасланғанда, түркийә 2021 – йили дунйаниң 11-, йавропаниң 4-чоң иқтисадий гәвдисигә айланди» деди.

түркийә дипломатийәсиниң йеқинқи әсирләрдин буйанқи әң мувәппәқийәтлик дәврини баштин кәчүрүватқанлиқини тәкитлигән әрдоған: «дөлитимизниң тиришчанлиқи нәтиҗисидә һасил қилинған ашлиқ каридори келишими инавити давалғушқа дуч кәлгән бирләшкән дөләтләр тәшкилатиниң йеқинқи йиллардин буйанқи әң зор мувәппәқийәтлириниң бири һесаблиниду» баһалиди.

җумһур рәис әрдоған сөзиниң ташқи сийасәткә мунасивәтлик қисмида, аралларни қоралландуруватқан гиретсийәни илһамландурушниң ақиланиликкиму, иттипақдашлиққиму йарашмайдиғанлиқини тәкитләп: «қутратқулуқ қилиш вә җиддийчиликни улғайтиш сийасити һечким мәнпәәт елип кәлмәйду» деди вә сөзини давамлаштуруп, америка қошма иштатлириниң җәнубий қибрис рум даирилиригә қаритилған қорал ембаргосини бикар қилиш қарариға «қобул қилғили болмайдиған қарар» дәп баһа бәрди.

у йәнә, түркийәгә берилгән вәдиләр әмәлгә ашмиғучә, әнқәрәниң шиветсийә билән финландийәниң шималий атлантик әһди тәшкилатиға әза болуши мәсилисидики пиринсипал вә қәтий мәйданини сақлап қалидиғанлиқини сөзлиригә илавә қилди.



مۇناسىۋەتلىك خەۋەرلەر