türkiye rusiyening ukrainaning bir qisim jaylirini özige qoshuwélishini ret qildi

türkiye awazi radiyosi xewiri: türkiye jumhuriyiti tashqi ishlar ministirliqi rusiyening ukrainaning bir qisim jaylirini özige qoshuwélishi toghrisida yazma bayanat élan qilip, türkiyening, rusiyening 2014 - yili qanunsiz halda référandum (omumiy xelq bélet tashlash paaliyiti) ötküzüp, qirimni özige qoushuwélishni étirap qilmighanliqini, izchil halda ukrainaning zémin pütünlüki, musteqilliqi we igilik hoquqini küchlük qollaydighanliqini tekitlep kelgenlikini eskertti؛ bayanatta: «biz 2014-yilidiki pozitsiyemiz boyiche, rusiyening, ukrainaning donétsiki, luxanski, xérson we zaporizhya rayonlirini özige qoshuwélish qararini ret qilimiz. xelqara qanunning omumlashqan pirinsiplirini éghir derijide depsende qilghan bu qararni qobul qilishimiz mumkin emes. biz künséri éghirlishiwatqan urushning söhbet arqiliq hasil qilinidighan adil tinchliq asasida hel qilinishini qollaydighanliqimizni tekrarlaymiz» dégen ibarilerge orun bérildi.

rusiye, qirim (2014), donétsiki, luxanski, xérson we zaporizhya qatarliq ukraina zéminlirining texminen 15 pirsentini öz zéminigha qoshuwaldi.

paytext moskwada ötküzülgen bir murasimda, pirézidént wiladimir putin bilen ​​rusiye terepdari atalmish hökümetlerning bashliqliri ukrainaning donétsiki, luxanski, xérson we zaporizhya rayonlirining rusiyege qoshulushi toghrisida kélishim imzalidi.