türkiye bilen amérikaning F-16 lar toghrisidiki söhbetliri dawamlashmaqta

türkiye bilen amérika qoshma ishtatlirining F-16 urush ayropilanliri toghrisidiki söhbetliri dawamlashmaqta.

1887107
türkiye bilen amérikaning F-16 lar toghrisidiki söhbetliri dawamlashmaqta

türkiye awazi radiyusi xewiri: amérika qoshma ishtatlirida ziyarette boluwatqan adalet we tereqqiyat partiyesining tashqi munasiwetlerge mesul muawin reisi efkan ala bashchiliqidiki wekiller ömiki F-16 urush ayropilanliri mesilisini öz ichige alghan bir qatar mesililer toghrisida söhbetlerni ötküzdi.

may éyida washingtonda ziyarette bolup, jemiy 25 palata ezasi bilen körüshken bu heyet, bu qétim téksas kéngesh palata ezasi téd kiruz qatarliq ikki kéngesh palata ezasi we 14 palata ezasi bilen körüshti.

türkiyening washingtondiki elchixanisida yépiq uchrishish ötküzgen heyet, söhbet jeryanida, türkiyege  F-16 tipliq urush ayropilanlirini sétip bérish we ularni zamaniwilashturush mesiliside ijabiy pozitsiye otturigha qoyulghanliqini bildürdi.

efkan ala amérika dölet mejilisidiki bezi guruppilarning türkiyege F-16 tipliq ayropilanlarni sétip bérishke shert qoyushqa urunush tirishchanliqini tenqid qilip: «biz amérika dölet mejlisining shimaliy atlantik ehdi teshkilati — natodiki ikki ittipaqdishi türkiye bilen girétsiyege adil we barawer ariliqni saqlap, dölitimizning ege mesilisidiki sezgürlükige hörmet qilishini we natoning kelgüsini shexsiy menpeetidin üstün orungha qoyushini ümid qilimiz» dédi.

girétsiyening yéqinqi mezgillerde türkiyege tutuwatqan pozitsiyesinimu tenqid qilghan efkan ala: «girétsiye pursetla tapsa, diplomatik yanchuqchiliq qiliwatidu, qilishqa tirishiwatidu» dédi.

söhbet jeryanida, türkiyening, amérikaning bölgünchi térrorluq teshkilati — p k k / y p g ge qiliwatqan yardemliridin biaram ikenlikimu otturigha qoyuldi.


خەتكۈچ: #uyghurche , #F-16 , #amérika , #türkiye

مۇناسىۋەتلىك خەۋەرلەر