erdoghan: bizning amérikadin kütidighinimiz, girétsiyege xata chot soqturmasliqidur

türkiye awazi radiyosi xewiri: jumhur reis erdoghan tünügün kechte bezi téléwiziye qanallirining birleshme söhbet pirogrammisigha qatniship, küntertiptiki mesililerge dair soallargha jawab berdi.

erdoghan, ege déngizidiki arallargha amérika qorallirining orunlashturulushini hemde amérikaning shimaliy atlantik ehdi teshkilati — natoda birlikte heriket qiliwatqan döletlerge adil muamile qilmighanliqini tenqid qilip: «girétsiye bilen türkiye her ikkisi natoda. biz natodiki aldinqi besh döletning biri. hem qoshqan töhpimiz hem quruqluq armiyemiz bilen muhim orunda turuwatimiz. natoda türkiye bilen girétsiyeni sélishturushqa bolmaydu. amérikaning bundaq köp qoral, mashina we üskünilerni arallargha ewetishini qobul qilghili bolmaydu» dédi.

u sözini dawamlashturup: «bizning amérikadin kütidighinimiz, girétsiyege xata chot soqturmasliqi we xelqara jamaet pikirining qaymuqturulushigha yol qoymasliqidur. biz tashqi ishlar ministirliqimiz arqiliq amérika we girétsiyege zörür agahlandurushlarni berduq. birleshken döletler teshkilati (b d t)ghimu axirqi mektupimizni 17 - séntebirde ewettuq» dégenlerni qeyt qildi.

amérikaning jenubiy qibris rim dairilirige qaratqan qoral émbargosini bikar qilishining ne mezmuni, ne waqtigha izahat bérishning mumkin emeslikini bildürgen erdoghan: «bu yéngi qedemning jawabsiz qalmaydighanliqini, qibris türklirining bixeterlikini qoghdash üchün her xil tedbirlerning yolgha qoyulidighanliqini hemme bilishi kérek» dédi.