chawushoghlu: musulmanlar ara qérindashliqni siyasettin üstün orungha qoyushimiz lazim
dölitimiz (türkiye jumhuriyiti) tashqi ishlar ministiri mewlüt chawushoghlu, musulmanlar ara qérindashliqni siyasettin üstün orungha qoyush lazimliqini éytti.
türkiye awazi radiyosi xewiri: birleshken döletler teshkilatining 77 – nöwetlik omumiy kéngesh yighini üchün amérika qoshma ishtatlirining niyu york shehiride ziyarette bolghan dölitimiz tashqi ishlar ministiri mewlüt chawushoghlu, islam hemkarliq teshkilatining yilliq maslashturush yighinida söz qildi.
musulmanlar dunyasining peqet hemkarliq asasida heriket qilghandila andin muhim netijilerni qolgha keltüreleydighanliqini eskertken chawushoghlu, sözlirini mundaq dawamlashturdi: «birleshken döletler teshkilati omumiy kéngishiningmu 15 – martni <xelqara islam düshmenlikige qarshi küresh küni> qilip békitishi, buning eng muhim misalliridin biridur. hörmetlik qérindashlirim, quran kerim, <ey iman éytqan kishiler, siler hemminglar qérindashsiler, qérindashliringlar bilen inaq yashanglar> démekte. shu wejidin, bizningmu musulmanlar otturisidiki qérindashliqni siyasettin üstün orungha qoyushimizgha toghra kélidu. peqet pütkül islam ümmitige munasiwetlik mesililerni chöridigen halda heriket qilghandila andin sadalirimizni bashqilargha anglitalishimiz mumkin.»
türkiyening pelestinlik qérindashlirigha ijabiy yardemde boluwatqanliqini eskertken chawushoghlu, mundaq dep körsetti: «musteqil we igilik hoquqluq bir dölet bolghan pelestinni we uning paytexti quddusni qollash bizning mesuliyitimizdur.»
u, qibris türklirining adaletsiz yétim qaldurush wa émbargolargha duch kéliwatqanliqini tekitlep mundaq dédi: «biz islam hemkarliq teshkilatigha eza döletlerning qibris türklirini qollishini kütüwatimiz. girétsiyediki az sanliq türklermu asasliq heq – hoquqliri we erkinlikliridin mehrum qéliwatidu, muptiliri wezipe ötiyelmeywatidu, ularning étnik kimlikliri we telim - terbiye sahesidiki heq – hoquqlirini ishlitishige ruxset qilinmaywatidu. biz qérindashlirimizdin özara hemkarliq asasida heriket qilishini kütüwatimiz.»
u yene, birleshken döletler teshkilati kishilik hoquq aliy komitéti teripidin yéqinda élan qilghan doklatning, xitayning uyghur aptonom rayonidiki uyghur türklirige qaratqan kishilik hoquq depsendichiliklirini ochuq - ashkara halda otturgha qoyghanliqinimu sözlirige ilawe qildi.
