әрдоған гиретсийә тоғрисида елан қилған байанати үстидә тохталди

түркийә авази радийоси хәвири: җумһур рәис рәҗәп таййип әрдоған балқан районидики үч дөләткә қилған зийаритини ахирлаштуруп дөләткә қайтиш сәпиридә, айропиланда мухбирларниң соаллириға җаваб бәрди.

у илгири гиретсийә тоғрисида ейтқан «бир кечә туйуқсиз бастуруп баримиз» дегән сөзи тоғрисидики соалға: «билдүрмәкчи болған мәнә наһайити ениқ. гиретсийәниң йеқинқи күнләрдики түркийәгә қарши позитсийәсини чүшәнгили болмайду. бир тәрәптә әгә деңизида қилған хилаплиқ қилмишлири бар, бәзидә натода вәзипә өтәватқан айропиланлиримизға паракәндичилик салди, һәтта <S-300> башқурулидиған бомбилар радарни қулуплашқа охшаш һәрикәтләрни қилди. бизниң <S-400> лиримизгә мунасивәтлик гәп қилғанларниң мушу чағқичә гиретсийәниң <S-300> лири тоғрисида бир нәрсә дегәнликини аңлидиңларму? <S-300> йаки <S-400> болсун һәммиси русийәдә йасалған. әмма, униңға һечқандақ гәп йоқ. бурнимизниң учидики аралларға келишим арқилиқ кәлтүрүлгән ғәйрий рәсмий салаһийәттики һәрбий күч билән қоралландурушқа тиришиватиду» деди.

у американиң гиретсийәдә һәрбий база қурғанлиқи үстидиму тохтилип, б д т омумий кеңиши йиғини (26-26-сентәбир) ға барғинида, пирезидент байдин билән көрүшүп, бу мәсилиләрни сөһбәтлишидиғанлиқини билдүрди.

у гиретсийәниң әгә вә шәрқий ақдеңиз мәсилисидә түркийәгә зорлап таңмақчи болған тизислириниң барлиқини әскәртип: «буниң қарап туридиған тәрипи йоқ. түркийә билән бивастә сөһбәтлишишниң орниға, б д т да, америкада, йавропа иттипақида, һәтта биз әң күчлүк болған натода үстимиздин шикайәт қилип, тәһдит пәйда қилишқа тиришиватиду. буни қобул қилишимиз мумкин әмәс. улар қандақ гәпни чүшәнсә, шундақ гәпни қилимиз. уларни чүшиниду дәп ойлаймән» деди.