chawushoghlu: «biz fethullahchilarning dölitimizge qarshi böhtanlirigha qarshi küresh qiliwatimiz»

türkiye awazi radiyosi xewiri: mewlut chawushoghlu 13 - nöwetlik bash elchiler yighini dairiside edliye ministiri bekir bozdaghmu bash elchilerge xitab qilghan yighinda nutuq sözlidi.

chawushoghlu türkiyening «térorluqtin nurghun azab chekken dölet» ikenlikini eskertip, «biz bir nechche yildin buyan adalet bilen bixeterlik otturisidiki nazuk tengpungluqni közitip kéliwatimiz. bu mesililer cheteldiki wezipilirimizning muhim terkibiy qismini teshkil qilidu. biz hem p k k gha, hem fethullahchilargha we bashqa térorluq teshkilatlirining wetinimizge qarshi teshwiqat we bötanlirigha qarshi küresh qiliwatimiz» dégen sözlerni ishletti.

chawushoghlu «zamaniwi diplomatiyening köp qatlamliq, köp xil ortaqliq we köp aktiyorluq» ikenlikini tekitlep, hemkarliq ornitishning organlar ara oxshimighan köz qarashlarni mollashturidighanliqini bildürdi. edliye ministirliqining bu organlarning aldinqi qatarida turidighanliqini tekitlep, «qanun bilen idare qilish, démokratiye we kishilik hoquq» qatarliq uqumlarning tashqi siyasetning asasiy prinsiplirining birsi ikenlikini éytti.

mewlut chawushoghlu yene, edliye ministirliqi bilen bolghan hemkarliq toghrisida melumat bérip, shiwitsiye we finlandiye bilen shimaliy atlantik ehdi teshkilatigha eza döletler üchün tüzülgen kélishimning muhim bir qismining edliye mesilisige chétilidighanliqini éytti. u yene sezgür tashqi siyaset mesililiride edliye ministirliqining pikir-tekliplirini élip, ortaq xizmet qilghanliqini eskertip, «yawropadiki puqralirimizgha qarita künséri küchiyiwatqan kemsitish we irqchiliq qilmishliri heqqide xizmet ishleshmu intayin muhim. biz edliye ministirliqi we cheteldiki teshkilatimiz bilen hemkarlishiwatimiz» dédi. mewlut chawushoghlu xelqara sahede yawropa kéngishi, yawropa kishilik hoquq soti we birleshken döletler teshkilati qatarliq teshkilatlar bilen nahayiti qoyuq hemkarlishiwatqanliqini qeyt qildi.