yawropa bixeterlik we hemkarliq teshkilati bash katipi türkiyege yuqiri baha berdi
yawropa bixeterlik we hemkarliq teshkilati bash katipi hélga maria shimid, paytext enqerede ötküzülgen 13 – nöwetlik bash elchiler yighinida söz qildi.
türkiye awazi radiyosi xewiri: yawropa bixeterlik we hemkarliq teshkilati bash katipi hélga maria shimid, paytext enqerede ötküzülgen 13 – nöwetlik bash elchiler yighinidiki sözi jeryanida: «türkiyening ashliq kélishimi hasil qilish yolida birleshken döletler teshkilati (b d t) bilen birlikte yolgha qoyghan diplomatiyesi kishini qayil qilidu» dédi.
shimid, türkiyening yéqindin buyan oynawatqan diplomatik roli heqqide toxtilip: «türkiyening ashliq kélishimi hasil qilish yolida birleshken döletler teshkilati (b d t) bilen birlikte yolgha qoyghan diplomatiyesi kishini qayil qilidu. chünki ashliq matériyalliri we oghutning ukrainadin chiqip dunyaning her qaysi jaylirigha yetküzülüshi intayin muhim» dédi.
yawropa bixeterlik we hemkarliq teshkilatining ukrainada türkiye wekilliri bilen hemkarliship xizmet qilish pursitige érishkenlikini eskertip ötken shimid, türkiyening tirishchanliqi bilen xelqara közetküchilerning ukrainadin chékindürülgenlikini bildürdi.
u, ukraina urushi bilen birlikte peyda bolghan quruqluq minaliri, urushning balilargha körsitidighan tesirliri we adem etkeschiliki qatarliq mesililerni hel qilishta türkiyening qollishigha mohtaj ikenliklirini otturigha qoydi.
bash katip shimid özining kespiy hayatining nahayiti uzun ikenlikige isharet qilghandin kéyin, «türkiye diplomatiyesi dunyadiki eng kespiy diplomatiyelerning biri» dédi.
u, türkiye diplomatiyesining ezeldin küchlük milliy alahidilikke ige ikenlikini tilgha élip: «türkiye yawropa bilen asiya otturisida köwrüklük roli oynimaqta. shunga, türkiye nöwettiki dunyaning köp xilliqchi chüshenchige eng mas döletlerning biri» dégenlerni qeyt qildi.
u yene, türkiyening bu funksiyesining yawropa bixeterlik we hemkarliq teshkilati qarmiqidiki tetqiqatlardimu öz ipadisini tapqanliqigha isharet qilip, türkiyening özbékistandin afghanistangha yardem bérishtiki muhim eshya oborot nuqtisi ikenlikini tekitlidi.
türkiyening erméniye bilen ezerbeyjanning normallishish musapisige qoshqan töhpisi we alaqidar terepler bilen hemkarlishishining özliri üchün intayin muhimliqini tilgha alghan yawropa bixeterlik we hemkarliq teshkilati bash katipi shimid, türkiyening «ayallar rehberlik supisi» gha qoshqan töhpisigimu yuqiri baha bérip: «ayallarning ishtiraki qanche köp bolsa, tinchliq kélishimlirining mudditi shunche uzun bolidu» dédi.
