türkiye qaraqalpaqistandiki weqeler toghrisida bayanat élan qildi

türkiye awazi radiyosi xewiri: ministirliqning bu heqtiki yazma bayanatida, özbékistanning qaraqalpaqistan jumhuriyitide yüz bergen weqelerning yéqindin közitiliwatqanliqi eskertilip: «biz ortaq medeniyet, kültür we tarixiy rishtimiz bolghan istratégiyelik hemrahimiz, dost we qérindash özbékistanning muqimliqi we güllinishige küchlük ehmiyet bérimiz» dégen ibarilerge orun bérildi.

weqeler jeryanida hayatidin ayrilghanlargha meghpiret we yarilanghanlargha shipaliqlar tilengen bayanatta: «biz özbékistan hökümiti we xelqning soghuqqanliqni saqlap, weqelerni tinchliq we xatirjemlik yoli bilen hel qilidighanliqigha toluq ishinimiz» déyildi.

özbékistan asasiy qanunidiki qaraqalpaqstan aptonom jumhuriyitining siyasiy salahiyitige munasiwetlik maddilargha özgertish kirgüzüsh toghrisidiki bezi tekliplerning küntertipige kélishi 7 - ayning 1 - küni qaraqalpaqstanda namayishlarning bashlinip kétishini keltürüp chiqarghan, weqedin kéyin özbékistan pirézidénti shewket mirziyayéw, namayishlar dawam qiliwatqan nukusqa bérip, xelq bilen körüshüp, qaraqalpaqstanning salahiyitining özgertilmeydighanliqini jakarlighanidi.

namayishlarning üzlüksiz dawamlishishidin kéyin pirézidént mirziyayéw perman chüshürüp, qaraqalpaqistan aptonom jumhuriyitide 2 - awghustqiche jiddiy halet élan qilghanidi.

özbékistan bash teptish mehkimisi, weqelerde 18 kishining qaza qilghanliqini, 243 kishining yarilanghanliqini we 516 kishining nazaret astigha élinghanliqini uqturghanidi.