«türkiyening jenubiy chégra liniyeliridiki herbiy heriketler qoshna ellerning tinchliqini qoghdimaqta»
dölet xewpsizlik kéngishi türkiyening jenubiy chégra liniyeliridiki herbiy heriketlerning hem milliy éhtiyajlarning teqezzasi hem qoshna ellerning tinchliqini qoghdawatqanliqini bildürdi.
türkiye awazi radiyosi xewiri: türkiye dölet xewpsizlik kéngishi yighini, jumhur reis rejep tayyip erdoghanning riyasetchilikide chaqirildi.
yighindin kéyin élan qilinghan bayannamide, mundaq déyildi: «jenubiy chégra liniyelirimizde dawamlashturuluwatqan herbiy heriketlerning nishani hergizmu qoshnilirimizning zémin pütünlüki bolmastin, eksiche hem milliy bixeterlik éhtiyajimizning teqezzasidur, shundaqla, chégra halqighan herbiy heriketlermu qoshna ellerning tinchliqini qoghdimaqta.»
térrorizmni qollap, xelqara qanunni depsende qiliwatqan döletler bu pozitsiyesidin waz kéchishke chaqiriq qilinghan bayannamide, «xelqara ittipaqlarda herdaim ittipaqdashliq rohi we qanunigha izchil riaye qilip kéliwatqan türkiye, ittipaqdashliridin oxshash mesuliyet we semimiyetni kütmekte» déyildi.
jumhur reis rejep tayyip erdoghan, düshenke küni chaqirilghan ministirlar kéngishi yighinidin kéyin élan qilghan bayanatida, mundaq dégenidi: «jenubiy chégra liniyelirimizni boylap 30 kilométir chongqurluqta bixeter rayonlarni berpa qilish üchün ishqa kirishtürgen paaliyetlirimizning kem qalghan qisimlirigha munasiwetlik yéngi qedemlernimu tashlashqa bashliduq. dölitimizge we bixeter rayonlirimizgha daim qiliniwatqan hujumlarning merkizi hésablinidighan rayonlar, herbiy herikitimizning eng muhim nishanidur. qoralliq qisimlirimiz, dölet xewpsizlik küchlirimiz we axbaratlirimiz teyyarliq xizmetlirini tamamlighan haman, bu heriketler bashlinidu.»
