chawushoghlu bilen lapid qoshma muxbirlarni kütüwélish yighini ötküzdi

türkiye awazi radiyosi xewiri: ministir mewlüt chawushoghlu dölet ishliri ziyaritide boluwatqan gherbiy quddusta israiliyelik mensepdishi yair lapid bilen ayrim we heyetler ara uchrishishlarni ötküzgendin kéyin qoshma muxbirlarni kütüwélish yighini ötküzdi؛ (israiliye bilen) chüshinishmesliklerge qarimay, diyalogni sijil dawamlashturushning yaxshi ehwal ikenlikini tekitligen chawushoghlu: «bu ish bir – birimizning sezgürlüklirige özara hörmet qilish asasida élip bérilishi lazim. bu peqet bizning ikki tereplik munasiwetlirimizgila emes, rayonimizning tinchliqighimu paydiliq bolidu» dédi.

u, israiliye tashqi ishlar ministiri bilen ötküzgen uchrishishi esnasida rayonluq mesililer toghrisidimu pikir almashturulghanliqini bildürüp: «ijabiy küntertipni yaqlighan halda munasiwetlerni dawamlashturush, chüshinishmesliklerni téximu berbachi shekilde muhakime qilishqa paydiliq bolushi mumkin. derweqe, ötken ramizan éyida ornitilghan dölet reislirimiz derijilik diyalog, tinch haletni saqlap qilish yolidiki tirishchanliqlargha hesse qoshti» dégenlerni qeyt qildi.

chawushoghlu, israiliye bilen ministirliqlar we alaqidar ammiwi organlar otturisidiki téxnikiliq uchrishishlarni qaytidin ornitish mesiliside birdeklik hasil qilinghanliqini bayan qilip: «nurghun sahelerdiki munasiwetlirimizni qaytidin janlandurush, buningdin kéyin oxshimighan méxanizmlarni ornitish we puqralar awiyatsiyesi toghrisidiki söhbetni eslige keltürüshke kélishtuq» dédi.

jughrapiyelik yéqinliq we bir - birini toluqlaydighan iqtisadiy gewdilerning türkiye bilen israiliyeni tebiiy soda shériklirige aylanduridighanliqini tekitligen tashqi ishlar ministiri chawushoghlu yene: «türkiye bilen israiliye özara eng köp soda qilidighan aldinqi 10 dölet qataridin orun alidu. kowid-19 yuqumigha  oxshash qiyinchiliqlargha, ötmüshimizdiki ixtilaplargha qarimay,  soda miqdarimiz üzlüksiz ashmaqta» dédi.

israiliye tashqi ishlar ministiri yair lapidmu: «hörmetlik ministir bilen ötküzgen uchrishishimizdin kéyin, özara ortaq (türkiye-israiliye) iqtisad komitéti teshebbusini eslige keltürüshni qarar qilduq» dédi.