erdoghan 19-may künini tebriklidi

türkiye awazi radiyosi xewiri: türkiye jumhur reisi rejep tayyip erdoghan 19-may atatürkni xatirilesh, yashliq we tenterbiye bayrimi munasiwiti bilen tarqatqan tebrik télégrammisida, türk yashlirining yoshurun küchige ishinidighanliqlirini éytti.

u tebrik télégrammisida, ghazi mustapa kamal atatürk türk yashlirigha sowgha qilghan 19-may künining, xelqning musteqilliq iradisi we söygüsining dunyagha jakarlanghanliqi we qarshiliq körsitish rohining qaytidin janlanghan küni ikenlikini bildürdi.

u 1919-yili 19-may türk xelqining mustemlikichi ishghal küchlirige qarshi zich ittipaqliship ornidin des turghanliqini, axirqi we ebediy dölet bolghan türkiye jumhuriyitining qurulushi üchün birlikte küresh qilip, tillarda dastan bolghan qehrimanliqlarni namayan qilip, axirida muqeddes ghelbini qolgha keltürgenlikini eskertti.

u mundaq dédi:

«biz bügünki künlerdimu tariximizdin hasil bolghan musteqilliq küchi we rohi bilen kelgüsige qarap méngiwatimiz, türkiyening tereqqiyati we iqtisadiy éshishigha tosqunluq qilmaqchi bolghanlargha qarshi toxtimay küresh qiliwatimiz. büyük we küchlük türkiye berpa qilish hayajénimizni izchil janliq tutush bilen birge, bu yoldiki eng muhim yoshurun küchimiz süpitide qarilidighan yashlirimizni her sahede qollaymiz we ulargha purset yaritip bérimiz.»

u: «milliy ang we küchlük xaraktérge ige yashlirimiz üchün pütün küchimiz bilen tirishimiz. türkiyede maariptin tenterbiyegiche, xewpsizliktin siyasetkiche, sodidin senetkiche bolghan her sahening aldinqi sepliride yashlarni körgenlikimizdin pexirlinimiz. dölitimizning 2023-yilliq nishanliri we 2053-yilliq ghayisini emelge ashurush yolida dawamliq yashlirimiz bilen bille mangimiz. bu qarashlar bilen, 19-may atatürkni xatirilesh, yashliq we tenterbiye bayrimini qizghin tebrikleymen, ghazi mustapa kamal atatürk we azadliq urushining barliq qehrimanlirini hörmet bilen esleymen» dédi.