erdoghan: misir bilenmu diplomatik munasiwetlerni eslige keltürüsh mumkin
jumhur reis rejep tayyip erdoghan misir bilenmu israiliyege oxshash diplomatik munasiwetlerni eslige keltürüshning mumkin ikenlikini éytti.
türkiye awazi radiyosi xewiri: jumhur reis erdoghan, seudi erebistan ziyaritini axirlashturup, türkiyege qaytishida, ayropilanda zhurnalistlargha küntertipke alaqidar özgirishler heqqide bergen bayanatida, seudi erebistan ziyaritining, ikki dölet otturisidiki munasiwetlerde yépyéngi bir dewrning xush xewerchisi bolidighanliqini tekitlep mundaq dédi: «seudi erebistan bilen meblegh salghuchilirimizni bir yerge jem qilidighan paaliyetler arqiliq zor iqtisadiy yoshurun küchni qaytidin janlandurush toghruluq birdeklik hasil qilduq.»
2023 – yilliq EXPO namzatliridin birining seudi erebistan ikenlikini bayan qilghan jumhur reis erdoghan, türkiye bolush süpiti bilen, riyadta ötküzülidighan EXPO 2030 ni qollaydighanliqlirini qeyt qildi.
u, türkiye – misir munasiwetliri heqqide toxtalghanda, mundaq dédi: «israiliyege qarita diplomatiye siyasitini yolgha qoyuwatimiz, misir bilenmu shundaq munasiwet ornitishimiz mumkin. derweqe, nöwette misir bilen töwen sewiyediki, hetta dölet bixeterlik teshkilatlirimiz otturisidiki munasiwetler dawamlashmaqta, karxanichilirimiz otturisidiki munasiwetlirimiz dawamlashmaqta. ijabiy netijiler, bu qedemlerni yuqiri sewiyedimu tashlashqa bolidighanliqidin dérek bermekte. birlik we barawerlikimizni ishqa ashurushni chin dilimizdin arzu qilimiz. chünki biz shundaq qilalighan haman, rayonning tinchliqi we ittipaqliqi téximu yuqiri sewiyege yétidu. biz oxshash étiqad we pikirlerni ortaqlishidighan rayonimizdiki döletler bilen téximu özgiche bir basquchqa qedem qoyushimiz kérek. bu bolsa düshmenlishish emes, dost tutush basquchidur.»
türkiyening rayonida hel qilghuch dölet ikenlikini éytqan erdoghan, türkiyening misir we israiliye bilen bolghan alaqisini buzushni héchqachan xalimighanliqini qeyt qildi.
israiliyening türkiyege éhtiyaji barliqini, türkiyeningmu, rayonning weziyiti we tinchliq pilanigha asasen bu döletke éhtiyaji barliqini bayan qilghan jumhur reis erdoghan, ramizan éyida israiliyelik bir qisim ashqun guruppilarning mesjidi eqsada peyda qilghan sürkilishlerdin biaramliq hés qilghanliqlirini tekitlep, buningdin kéyin bundaq weqelerning qayta yüz bermeslikini ümid qilidighanliqlirini ipadilidi.
