erdoghan: seudi erebistan bilen hemkarliqni kücheytishimiz  ortaq menpeetimizge uyghun

türkiye awazi radiyosi xewiri: jumhur reis rejep tayyip erdoghan, ammiwi ortaqlishish tor bétidiki sehipiliride élan qilghan bayanatida, seudi erebistan padishahi selman bin abduleziz essuudning teklipige biinaen seudi erebistangha yétip barghanliqini tekitlep mundaq dédi: «ikki heremning xadimi padishah selman bin abduleziz essuudning teklipige biinaen seudi erebistanda ziyarette bolduq. tarixiy, medeniyet we kishilik munasiwetlerge ige ikki qérindash dölet bolush süpitimiz bilen, arimizdiki türlük siyasiy, herbiy we iqtisadiy munasiwetlerni kücheytip, yéngi dewrni bashlashqa tirishiwatimiz.»

seudi erebistan – türkiye otturisidiki  türlük hemkarliqlar toghriliqmu toxtalghan jumhur reis erdoghan, mundaq dep körsetti: «seudi erebistan bilen saghlamliq, énérgiye, yémeklik bixeterliki, déhqanchiliq téxnikisi, mudapie sanaiti we pul-muamile qatarliq sahelerdiki hemkarliqimizni kücheytishning ortaq menpeetimizge uyghun ikenlikige ishinimiz. qayta hasil bolidighan we pakiz énérgiye téxnologiyeliride muhim yoshurun küchimizning barliqini körüwatimiz. biz her sorunda <pars qoltuqi> rayonidiki qérindashlirimizning muqimliqi we bixeterlikige oxshashla ehmiyet béridighanliqimizni ipadilep kéliwatimiz. biz her xil shekildiki térrorluqqa qarshi ikenlikimizni we rayonimizdiki döletler bilen birlikte térrorizmgha qarshi hemkarliqqa ehmiyet béridighanliqimizni tekitleymiz. munasiwetlirimizni her sahede ötmüshtin halqitip yenimu yüksek sewiyege yetküzeleydighanliqimizgha ishinimen. rebbimizning rehim-shepqiti, meghpiriti we köyümchanliqi rohiy dunyamizni qorshap turuwatqan mubarek ramizan éyidiki bu ziyaritimiz,  dost we qérindash dölet seudi erebistan bilen yéngi dewrning derwazilirini achidu.»

jumhur reis rejep tayyip erdoghan seudi erebistan padishahi selman bin abduleziz essuud bilen bir yerge jem bolghanidi.

tünügün (28-aprél) kech tereplerde seudi erebistanning jidde shehirige yétip barghan jumhur reis erdoghan, seudi erebistan padishahi selman bin abduleziz essuud teripidin resmiy murasim arqiliq qarshi élinghanidi.

qarshi élish murasimidin kéyin, jumhur reis rejep tayyip erdoghan bilen seudi erebistan padishahi selman bin abduleziz essuud, axbarat wastilirigha yépiq halette ayrim körüshkendin kéyin, kechlik tamaq ziyapitige qatnashqanidi.

jumhur reis erdoghan, kéyinche seudi erebistan text warisi shahzade muhemmed bin selman bilen bir yerge jem bolghanidi.

elsalam saridiki uchrishish, axbarat wasitilirigha yépiq halette ishqa ashurulghanidi.

jumhur reis erdoghan, seudi erebistangha qarap yolgha chiqish harpisida bergen bayanatida, seudi erebistan ziyariti esnasida, türkiye – seudi erebistan munasiwetlirini keng dairilik közdin kechüridighanliqlirini, hemde hemkarliqni yenimu yüksek sewiye yetküzüsh imkaniyetliri toghruluq muzakire élip baridighanliqlirini éytqanidi.