chawushoghlu panamada ziyarette boldi
tashqi ishlar ministiri mewlüt chawushoghlu panamada dölet ishliri ziyaritide boldi.
türkiye awazi radiyosi xewiri: tashqi ishlar ministiri mewlüt chawushoghlu dölet ishliri ziyaritide bolghan panamada tashqi ishlar ministiri érika moynés bilen bir yerge jem boldi, hemde ayrim we heyetler ara uchrishishlardin kéyin ötküzülgen qoshma axbarat élan qilish yighinida, türkiye – panama otturisidiki iqtisadiy hemkarliqning yenimu yüksek sewiyege yetküzülüshining zörürlükini tekitlidi.
u mundaq dédi:
«ikki dölet otturisidiki soda omumiy sommimiz bultur %50 éship, 323 milyon dollargha yetti. diplomatiye, soda – iqtisad jehettiki yoshurun küchi bilen öz rayonida muhim rol oynawatqan panamani qimmetlik shérik dep qaraymiz. bolupmu sayahet, énérgiye we eshya oborotida zor yoshurun küch bar. biz imzalaydighan soda, sayahet we iqtisadiy hemkarliq kélishimi, döletlirimizning birleshme iqtisadiy komitét we soda kéngishi qurushida muhim rol oynaydu. sayahet hemkarliqi kélishimi sayisida ikki dölet bir - birige téximu yéqinlishidu. türkiye bilen panamaning her ikkisi sayahet dölitidur. türkiye hawa yolliri shirkitining panama bilen istanbul otturisida biwasite uchushi toghriliqmu birdeklik hasil qilduq.»
panama uniwérsitétlirida maarip we medeniyet saheliride türk tili ögitilishi üchün hemkarliqning kücheytilidighanliqini bayan qilghan chawushoghlu, bu heqte muweppeqiyetlik uchrishishlarni élip barghanliqlirini qeyt qildi.
panama tashqi ishlar ministiri érika moynés bolsa, chawushoghluning ziyaritining türkiye – panama otturisidiki tunji resmiy ziyaret ikenlikini eskertip mundaq dédi: «hörmetlik chawushoghlu ependimning dölitimizge qilghan ziyariti dairiside, her ikki döletke paydiliq iqtisadiy we soda hemkarliqi mesililiri toghruluq muzakire élip barduq. chawushoghluni kütüwalghanliqimiz üchün intayin xushalmiz.»
chawushoghlu bilen tertipsiz köchmenlik mesililiri heqqide muzakire élip barghanliqlirini qeyt qilghan moynés, bu ziyaret munasiwiti bilen muhim yer shariwi mesililer heqqide özara pikir almashturghanliqlirini, hemde maarip we akadémiye témilirini öz ichige alghan köpligen mesililerni közdin kechürgenliklirini tekitlidi.
tashqi ishlar ministiri mewlüt chawushoghlu, panamada ziyaritini axirlashturghandin kéyin, latin amérika ziyaritining axirqi békiti bolghan wénézuélagha ötti.
chawushoghlu, ammiwi ortaqlishish tor bétidiki sehipiside, bu heqte élan qilghan bayanatida, mundaq dédi: «birleshme hemkarliq komitétining 3 – nöwetlik yighinigha teng hoquqluq reisi süpitide riyasetchilik qilish we türlük uchrishishlarda bolush üchün wénézuélagha yétip kelduq.»
