түркийә - америка истратегийәлик механизми иҗра қилинишқа башланди

түркийә - америка истратегийәлик механизминиң пайтәхт әнқәрәдә һәрикәткә кәлтүрүлгәнлики уқтурулди.

1807156
түркийә - америка истратегийәлик механизми иҗра қилинишқа башланди

түркийә авази радийоси хәвири: түркийә җумһурийити ташқи ишлар министирлиқи тәрипидин елан қилинған түркийә - америка истратегийәлик механизми тоғрисидики бирләшмә ахбарат байанатида, «һөрмәтлик җумһур рәис рәҗәп таййип әрдоған билән америка пирезиденти җо байдинниң өктәбирдә римда (италийәниң пайтәхти) һасил қилған келишимигә асасән, түркийә – америка истратегийәлик механизми 2022- йили 4- апрел әнқәрәдә һәрикәткә кәлтүрүлди» дегән ибариләргә орун берилди.

ташқи ишлар министирлиқиниң муавин министири, баш әлчи сәдат өналниң америка ташқи ишлар министирлиқиниң сийасий ишларға мәсул муавин министири виториа нуланд билән түнүгүн пайтәхт әнқәрәдә өткүзгән һәйәтләр ара учришишида, иқтисадий вә мудапиә һәмкарлиқи, терроризмға қарши күрәш, икки дөләтниң район вә дунйави мәнпәәтлиригә мунасивәтлик мәсилиләрниң көздин кәчүрүлгәнлики әскәртилгән байанатта: «түркийә билән америка қошма иштатлири украинаниң игилик һоқуқи вә земин пүтүнлүкини қоғдаштики ортақ вәдисини қайта тәкитлиди. америка түркийәниң урушни адил вә дипломатик йол билән һәл қилиш тиришчанлиқини қарши алди» дейилди.

америка сода министирлиқиниң муавин министири мариса лагониңму 5- 6- апрел күнлири пайтәхт әнқәрәдә зийарәттә болуп, истратегийәлик механизмниң иқтисадий вә сода саһәсини илгири сүрүшкә мунасивәтлик мәсилиләр тоғрисида сөзлишидиғанлиқи билдүрүлгән байанатта, түркийә билән американиң истратегийәлик механизм даирисидә ечилидиған ташқи ишлар министирлири дәриҗилик йиғинни бу йил ечишни пиланлаватқанлиқиға даир учурларғиму орун берилди.

 



مۇناسىۋەتلىك خەۋەرلەر