erdoghan bilen baydin ukraina-rusiye urushi we rayon weziyitini muzakire qildi
türkiye jumhur reisi rejep tayyip erdoghan amérika pirézidénti jo baydin bilen téléfonda körüshkenliki bildürüldi.
türkiye awazi radiyosi xewiri: jumhur reislik uchur-alaqe idarisi rejep tayyip erdoghan bilen amérika pirézidénti jo baydinning téléfonda körüshkenliki toghrisida bayanat élan qildi.
bayanatta körsitilishiche, körüshüshte, rusiyening ukrainagha qilghan hujumini öz ichige alghan rayonning nöwettiki weziyiti we türkiye-amérika munasiwetliri muzakire qilinghan.
jumhur reis rejep tayyip erdoghan rusiye bilen ukraina otturisida mesilini siyasiy yol bilen hel qilishni kapaletke ige qilish tirishchanliqlirini dawamlashturghanliqlirini bildürüp, kirizisning téximu chongqurlishish éhtimaligha qarshi türkiyening her ikki terep bilen söhbetlishishi we mesilini hel qilish izdinishliride asanlashturghuchi bolushining muhim ikenlikini qeyt qildi.
u türkiye achqan ishench qanili sayisida rusiye we ukraina tashqi ishlar ministirlirining bügün (10-mart) türkiyening sahibxanliqida antalyada biwaste sözlishish imkaniyitige ige bolushining ehmiyitini tekitlidi we antalyada yighin échishningmu diplomatiyening ghelbisi ikenlikini tekitlidi.
u türkiyening amérikadin 40 dane yéngi ayropilan sétiwélishni we qolidiki «F-16» ayropilanlirini zamaniwiylashturuni öz ichige alghan telipini eng qisqa waqit ichide netijilendürülüshini kütüwatqanliqlirini bildürüp, mudapie sanaiti saheside türkiyege qaritilghan barliq adaletsiz émbargolarni emeldin qaldurulush waqtining alliburun yétip kelgenlikini qeyt qildi.
