türkiye, türkiye - ezerbeyjan diplomatik munasiwet ornatqanliqining 30 yilliqini tebriklidi

türkiye awazi radiyosi xewiri: türkiye jumhuriyiti tashqi ishlar ministirliqi yazma bayanat élan qilip, ikki dölet otturisidiki diplomatik munasiwetning 30 yil ilgiri «diplomatik munasiwetni qayta ornitish kélishimnamisi» ning imzalinishi bilen bashlanghanliqini we türkiyening ezerbeyjan musteqilliqini jakarlighandin kéyin diplomatik munasiwet ornatqan tunji dölet bolghanliqini xatirilitip ötti.

ezerbeyjanning 1991- yili 10- ayning 29- küni xelqara jemiyetning barawer hoquqqa ige ezasi bolghanliqigha dair iradisini küchlük ipadiligenliki tekitlengen bayanatta, türkiyening eyni waqitta goya qosh bayramni bashtin kechürgenliki bildürülüp: «ötken 30 yil boyiche türkiye yaxshi – yaman künlerde dosti we qérindishi ezerbeyjanning yénida turup keldi, buni qehriman ezerbeyjan armiyesining 44 künlük weten urushi arqiliq zéminini ishghaldin azad qilghandin kéyin hés qilghan zor xushalliq bilen yene bir qétim namayan qildi» dégen ibarilerge orun bérildi.

her ikki döletning 30 yil ilgirikige qarighanda köp küchlük ikenlikige isharet qilinghan bayanatta, ikki döletning qérindashliq we yéqin hemkarliqining ortaq rayondiki tinchliq we muqimliqning zor kapalitige aylanghanliqi otturigha qoyuldi.

bayanatta, 2021- yili 6- ayning 15- küni imzalanghan «shusha xitabnamisi» bilen ittipaqdashliq derijisige kötürülgen munasiwetlerning buningdin kéyinmu dawam qilidighanliqi tekitlinip: «jumhuriyitimizning qurghuchisi ghazi mustafa kamal atatürkning <ezerbeyjanning xushalliqi bizning xushalliqimiz, uning qayghusi bizning qayghumiz> dégen ipadisige mas kélidighan usul, shundaqla omumiy milli rehber heyder eliyéw otturigha qoyghan <bir millet, ikki dölet> shuarigha yarishidighan pozitsiyemu del budur» dégenler qeyt qilindi.