چاۋۇشئوغلۇ تۈركىيەنىڭ تاشقى سىياسەتتە دىپلوماتىيەنى ئاساسىي ئورۇنغا قويىدىغانلىقىنى ئېيتتى

تۈركىيە ئاۋازى رادىيوسى خەۋىرى: چاۋۇشوغلۇ خەلقئارا مۇناسىۋەت كېڭىشى جەمئىيىتى تەرىپىدىن ئىنتېرنېت مۇھىتىدا ئۇيۇشتۇرۇلغان خەلقئارا بىخەتەرلىك ئاكادېمىيەسىنىڭ يېپىلىش يىغىنىغا قاتنىشىپ سۆز قىلدى؛ رۇسىيە بىلەن ئۇكرائىنا، رۇسىيە بىلەن شىمالىي ئاتلانتىك ئوكيان ئەھدى تەشكىلاتى – ناتو ئوتتۇرىسىدىكى رىقابەتنىڭ خەتەرلىك دەرىجىگە بېرىپ قالغانلىقىنى تىلغا ئالغان چاۋۇشئوغلۇ: «بىز پەقەت رۇسىيە بىلەن كەڭ دائىرىلىك مۇناسىۋىتىمىز بولغانلىقى ئۈچۈنلا پىرىنسىپلىرىمىزغا ۋە ئۇكرائىنا بىلەن بولغان قويۇق مۇناسىۋىتىمىزگە سەل قارىمايمىز. بۇنىڭغا ئوخشاش نۇرغۇن قىيىن ئەھۋاللاردا، شارائىت ۋە دۆلەت بىخەتەرلىكىمىز نېمىنى تەلەپ قىلسا، شۇنى قىلىمىز. بۇ قىيىن ئىش، ئەمما دىپلوماتىيەنىڭ ئىشى مۇشۇ» دېدى.

چاۋۇشئوغلۇ تاشقى سىياسەتنى مىللىي قىممەت – قاراشلار، پاكىتلار، مۇمكىنچىلىك ۋە ئىقتىدارلار ئاساسىدا ئېلىپ بېرىۋاتقانلىقلىرىنى تەكىتلەپ، تۈركىيەنىڭ دىپلوماتىيەنى پىرىنسىپقا دەخلى - تەرۇز قىلماستىن، رېئال ئۇسۇل بىلەن ئېلىپ بارىدىغانلىقىنى ئەسكەرتتى.

دۆلەت بىخەتەرلىكىنىڭ ئەڭ مۇھىم كاپالىتىنىڭ بىرىنىڭ تۈركىيەنىڭ يالتايتىش كۈچى ئىكەنلىكىنى ئوتتۇرىغا قويغان چاۋۇشئوغلۇ، يالتايتىش قۇدرىتىگە ئىگە بولۇش ئۈچۈن ھەربىي كۈچ، نوپۇس ۋە ئىقتىسادىي كۈچ قاتارلىق ئامىللاردىن باشقا، ئۈنۈملۈك دىپلوماتىيەگىمۇ ئېھىتياج بارلىقىنى ئېيتتى.

تۈركىيەنىڭ كەڭ جۇغراپىيەلىك ماكاندا دىپلوماتىك تەشەببۇس ئەۋزەللىكىنى ئاساس قىلغان رېئال تاشقى سىياسەت يۈرگۈزۈۋاتقانلىقىنى تەكىتلىگەن چاۋۇشوغلۇ: «بىزدە پائالىيەتلەرنىڭ  بىزگە ھۆكۈمرانلىق قىلىشىغا يول قويماستىن، ئىنكاس خاراكتېرلىك ئەمەس، ئاكتىپ دىپلوماتىيە يۈرگۈزۈش چۈشەنچىسى بار» دېگەنلەرنى قەيت قىلدى.

چاۋۇشئوغلۇ ئۆزلىرىنىڭ دىپلوماتىيەنى ھەمىشە ئالدىنقى ئورۇنغا قويۇپ كەلگەنلىكلىرىنى ۋە بۇنىڭدىن كېيىنمۇ شۇنداق قىلىدىغانلىقلىرىنى ئەسكەرتىپ، لىۋىيە، شەرقىي ئاقدېڭىز ۋە سۈرىيەگىچە بولغان بارلىق جايلاردا «ئالدى بىلەن دىپلوماتىيە» دەپ كەلگەنلىكلىرىنى تەكىتلىدى.

چاۋۇشوغلۇ: «بىز دىپلوماتىيە توسقۇنلۇققا ئۇچرىغان ئەھۋاللاردىمۇ مەيدانغا چۈشتۇق، بۇ قەتئىيلىك رايونىمىزدىلا ئەمەس، دۇنيانىڭ ھەر قايسى جايلىرىدا بىزنىڭ مىللىي كۈچ چۈشەنچىمىز ۋە يالتايتىش قۇدرىتىمىزنى ئاشۇردى» دېگەنلەرنى سۆزلىرىگە ئىلاۋە قىلدى.