erdoghan xelqara istratégiyelik uchur - alaqe yighinigha télégramma yollidi

türkiye awazi radiyosi xewiri: jumhur reis erdoghan, istanbulda ötküzülgen xelqara istratégiyelik uchur - alaqe yighini (Stratcom Summit '21) gha sin körünüshlük télégramma yollidi.

télégrammisida, téxnikiliq tereqqiyatning süriti ashqan reqemlishish ijtimaiy we kishilik turmushqa chongqur tesir körsitiwatqan bir dewrning bashtin kechürülüwatqanliqini tekitligen erdoghan: «bu jeryanda istratégiyelik uchur - alaqe paaliyitining ehmiyitini barghanséri kücheytmekte. ijtimaiy alaqe qanallirining kéngiyishige egiship, yalghan, saxta, uydurma xewerlerning téz tarqiliwatqanliqini körmektimiz. ünümlük kontrol méxanizmi bolmighan bu qanallardin tarqalghan bundaq xewerler sewebidin milyonlighan kishilerning turmushi zulmetke aylanmaqta. tunji otturigha chiqqan chaghlirida erkinlikning simwoli dep teswirlengen ijtimaiy taratqu, zamanimiz démokratiyesi üchün asasliq tehdit menbesige aylanmaqta» dégenlerni qeyt qildi.

türkiyege oxshash dunyaning tereqqiy qilghan démokratik döletliriningmu reqemlik fashizm we saxta xewerler ewj éliwatqan hazirqidek peytte hoshyarliqni östürgenlikini bayan qilghan erdoghan: «puqralirimizning toghra we biterep xewerlerge érishish hoquqigha dexli qilmighan asasta, xelqimizni, bolupmu jemiyitimizning ajiz qatlamlirini qoghdashqa tirishiwatimiz » dédi.

«dunyadiki yaxshi misallargha asasen, zörür bolghan qanun we memuriy nizamlarni özimizning éhtiyaji dairiside yolgha qoyuwatimiz» dégen erdoghan: «biz shuni tekitleymizki, her qandaq bir shirketning maliye küchi, xelqaraliq orni we telipi qandaq bolushidin qetiynezer, qanundin üstün bolmaydu. özini dunyawi dep qarawatqan torlargha qarimay, ochuq we pakiz alaqe usuli bilen kürishimizni qetiy dawamlashturimiz. biz heqiqet we pakitlarning yalghanchiliq bilen burmilinishigha qetiy yol qoymaymiz» dégenlerni qeyt qildi.