قالىن: خەلقئارا جەمئىيەت كۆچمەنلەر كىرىزىسىنى ھەل قىلىشتا مەغلۇبىيەتكە ئۇچرىدى

جۇمھۇر رەئىسلىك مەھكىمىسى باياناتچىسى ئىبراھىم قالىن، خەلقئارا جەمئىيەتنىڭ قانۇنسىز كۆچمەنلەر كىرىزىسىنى بىر تەرەپ قىلىشتا مەغلۇبىيەتكە ئۇچرىغانلىقىنى ئوتتۇرىغا قويدى.

1742921
قالىن: خەلقئارا جەمئىيەت كۆچمەنلەر كىرىزىسىنى ھەل قىلىشتا مەغلۇبىيەتكە ئۇچرىدى

تۈركىيە ئاۋازى رادىيوسى خەۋىرى: جۇمھۇر رەئىسلىك مەھكىمىسى باياناتچىسى ئىبراھىم قالىن، ئىتالىيە تاشقى ئىشلار مىنىستىرلىقى بىلەن خەلقئارا سىياسىي تەتقىقاتلار ئىنستىتۇتىنىڭ ئورۇنلاشتۇرۇشىدا رىمدا چاقىرىلغان 7 – نۆۋەتلىك ئاقدېڭىز دىيالوگ مۇنبىرىنىڭ «ئوتتۇرا شەرق ۋە شىمالىي ئافرىقادا كۈچ تەڭپۇڭلۇقى ۋە ئامېرىكا مەۋجۇتلۇقىنىڭ كەلگۈسى» تېمىلىق يىغىنىغا ئىشتىراپ قىلىپ، خەلقئارا جەمئىيەتنىڭ قانۇنسىز كۆچمەنلەر كىرىزىسىنى بىر تەرەپ قىلىشتا مەغلۇبىيەتكە ئۇچرىغانلىقىنى ئوتتۇرىغا قويدى.

تۈركىيەنىڭ تۆت مىليون سۈرىيە پۇقراسىنى كۈتۈۋالغانلىقىنى تىلغا ئالغان قالىن،  ياۋروپا ئىتتىپاقى بىلەن ئىمزالانغان كۆچمەنلەر كېلىشىمىنىڭ قايتىدىن مۇزاكىرە قىلىنىشى كېرەكلىكىنى، غەرب دۆلەتلىرىنىڭ بۇ جەھەتتىكى سىياسىتىنىڭ توغرا ئەمەسلىكىنى، تەرتىپسىز كۆچمەنلەرگە پەقەت سانلىق مەلۇمات سۈپىتىدە قارىلىۋاتقانلىقىنى تەكىتلىدى.

باياناتچى ئىبراھىم قالىن، ياۋروپا ئىتتىپاقىنىڭ كۆچمەنلەر مەسىلىسى ئۈچۈن تۈركىيەگە ئاجرىتىپ بەرگەن 6 مىليارد ياۋرو ياردىمى توغرىسىدىمۇ توختىلىپ: «ئەگەر بىز مەسىلىنىڭ چوڭلۇقىنى ئويلىشىدىغان بولساق، بۇ ھېچنىمە ئەمەس» دېدى.

ئۇ يىغىندىن كېيىن بايانات بېرىپ، تۈركىيەنىڭ شەرقىي ئاقدېڭىزدىكى ئاكتىپ سىياسىتى ھەققىدە توختالدى؛ جۇمھۇر رەئىس ئەردوغاننىڭ ئاقدېڭىز دۆلەتلىرى بىلەن ياخشى مۇناسىۋەت ئورنىتىش ئۈچۈن قويۇق دىپلوماتىيە ئېلىپ بېرىۋاتقانلىقىنى بايان قىلغان قالىن، ئەردوغاننىڭ بىر يىلدىن كۆپرەك ۋاقىت ئىلگىرى ھەم ياۋروپا ئىتتىپاقى ھەمدە باشقا دۆلەتلەرنى شەرقىي ئاقدېڭىز يىغىنى ئېچىشقا چاقىرغانلىقىنى خاتىرىلىتىپ ئۆتتى.

ئىبراھىم قالىن يەنە، تۈركىيەنىڭ سۈرىيە ۋە لىۋىيەنىڭ زېمىن پۈتۈنلۈكى ۋە بىرلىكىنى قوللايدىغانلىقىنى سۆزلىرىگە ئىلاۋە قىلدى.



مۇناسىۋەتلىك خەۋەرلەر