türkiye 14 esker shéhit bolup ketken tik uchar qazasi tüpeyli ezerbeyjangha teziye bildürdi

türkiye ezerbeyjanda döletlik chégra mulazimet idarisigha ait tik uchar qazasida shéhit bolup ketken 14 esker üchün teziye bayanati élan qildi.

1741026
türkiye 14 esker shéhit bolup ketken tik uchar qazasi tüpeyli ezerbeyjangha teziye bildürdi

türkiye awazi radiyosi xewiri: ezerbeyjan döletlik chégra mulazimet idarisining bildürüshiche, idarigha ait bir herbiy tik uchar ayropilan, shu jay waqti etigen saet 10 din 40 minut ötkende, xizi rayonining qaraheybet hawa meshiq saheside chüshüp ketken, qazada 14 esker shéhit bolghan, 2 esker yarilanghan.

dairiler neq meydangha yétip bérip, bu heqte uchur igiligen we qazaning kélip chiqish sewebi tekshürülüshke bashlighan.

ezerbeyjan pirézidénti ilham eliyéw, bu heqte élan qilghan bayanatida, qazada shéhit bolghan eskerlerning aile tawabiatliri we yéqin – yoruqlirigha teziye bildürgen.

bu ariliqta,  türkiye ezerbeyjanda qaraheybet hawa meshiq saheside chüshüp ketken herbiy tik uchar ayropilan qazasida shéhit bolup ketkenler üchün teziye  bayanati élan qildi.

türkiye tashqi ishlar ministirliqi teripidin bu heqte élan qilinghan yazma bayanatta, enqerening, ezerbeyjanning  xizi rayonining qaraheybet hawa meshiq saheside bir herbiy tik uchar ayropilanning chüshüp ketkenlikidin we qazada shéhit bolush we yarilinish ehwalining körülgenlikidin tolimu epsuslanghan halda xewer tapqanliqi bildürülüsh bilen bir waqitta, shéhitlargha allah taaladin rehmet, yarilanghanlargha shipaliq tilendi.

türkiye büyük millet mejlisi bashliqi mustafa shentop, ammiwi ortaqlishish tor bétidiki sehipiside, ezerbeyjangha teziye bildürüp élan qilghan bayanatida, mundaq dédi: «bügün yüz bergen tik uchar ayropilan qazasida shéhit bolup ketken ezerbeyjanliq qérindashlirimizgha janabiy allahtin rehmet, yarilanghanlargha shipaliq tileymen, ezerbeyjan xelqige teziye bildürimen.»

muawin jumhur reis fuat oktay, ammiwi ortaqlishish tor bétidiki sehipiside élan qilghan bayanatida, mundaq dédi: «bügün yüz bergen échinishliq tik uchar ayropilan qazasida shéhit bolup ketken ezerbeyjanliq qérindashlirimizgha allahtin rehmet, yarilanghanlargha shipaliq tileymen, janjiger ezerbeyjan xelqige we hökümitige teziye bildürimen.»

tashqi ishlar ministiri mewlüt chawushoghlu bolsa, ezerbeyjan diplomatiye ministiri jeyhun bayramow bilen téléfonda körüshüp, tik uchar ayropilan qazasida shéhit bolup ketken eskerler üchün teziye bildürdi, yarilanghan eskerler üchün shipaliq tilidi.

dölet mudapie ministiri xulusi aqar, ezerbeyjan dölet mudapie ministiri général zakir hesenow we döletlik chégra mulazimet idarisining bashliqi général elchin guliyéw bilen téléfonda körüshüp, teziye bildürdi.

téléfon söhbübetliride, ministir aqar,  qaraheybet hawa meshiq saheside chüshüp ketken döletlik chégra mulazimet idarisigha ait tik uchar ayropilan qazasida shéhit bolup ketken eskerler üchün allah taaladin rehmet, yarilanghanlargha shipaliq tilidi, hemde dost we qérindash dölet ezerbeyjan xelqige teziye bildürdi, shéhitlarning aile tawabiatlirigha sewr - taqet tilidi.

türkiye dölet mudapie ministirliqining ammiwi ortaqlishish tor béti Twitter sehipiside élan qilinghan bayanatta, mundaq déyildi: «qérindash dölet ezerbeyjanda döletlik chégra mulazimet idarisigha ait bir herbiy tik uchar ayropilanning chüshüp ketkenlikidin tolimu epsuslanghan halda xewer taptuq, bu échinishliq hadiside arimizdin ayirilip qalghan shéhitlirimizgha allah taaladin rehmet, yaridarlirimizgha shipaliq tileymiz, pütkül ezerbeyjanliq qérindashlirimizgha teziye bildürimiz hem sewr - taqet tileymiz.»

jumhur reislik mehkimisi bayanatchisi ibrahim qalinmu, ammiwi ortaqlishish tor bétidiki sehipiside élan qilghan bayanatida, mundaq dédi: «bu échinishliq qazada shéhit bolup ketken qérindashlirimizgha allah taaladin rehmet, yarilanghanlargha shipaliq tileymen, <bir millet, ikki dölet> ke teziye bildürimen.»

jumhur reislik mehkimisi uchur - alaqe ishliri idarisining bashliqi fahrettin altun bolsa, ammiwi ortaqlishish tor bétidiki sehipiside élan qilghan bayanatida, mundaq dédi: «ezerbeyjan döletlik chégra mulazimet idarisigha ait bir herbiy tik uchar ayropilanning chüshüp kétishi netijiside shéhit bolup ketken qérindashlirimizgha allah taaladin rehmet, yaridarlirimizgha shipaliq tileymen, ezerbeyjanning derd – elemi türkiyeningmu derd – elemidur, pütkül ezerbeyjanliq qérindashlirimizgha teziye bildürimen.»



مۇناسىۋەتلىك خەۋەرلەر