türkiye qizilay jemiyiti musapirlargha yardem qilishqa teyyar ikenlikini bildürdi

türkiye awazi radiyosi xewiri: türkiye qizilay jemiyitining bashliqi kerem kinik jemiyetning edirne shöbiside jemiyet xadimliri we qizilay pidaiyliri bilen körüshti.

u qizilayning 153 yildin buyan oxshash pirinsip we qimmet qarashliri bilen heriket qilghanliqini bildürüp: «biz insanning izzet-hörmitini qoghdash, uning azabini yenggillitish, uni qollash we u layiq bolghan hayatni yashiyalishi üchün qollashni meqset qilimiz » dédi.

u 2020-yili edirnede yüz bergen qalaymiqan köchüsh herikitide, türkiye qizilay jemiyitining muhim rol oynighanliqini eskertti.

u bügün bélarusiye-polsha chégrasida mushuninggha oxshash qanunsiz köchmenler herikitining yüz bergenlikini bildürüp: «bu kishiler eng asasliq insanperwerlik yardimige érishishte qiyinchiliqqa duch kelmekte. men minsikqa bérip, qizil krést jemiyiti xadimliri bilen körüshtüm we ulargha yardem qilalaydighanliqimizni éyttim. arqidin yawropa xewpsizlik we hemkarliq teshkilatining parlamént mejlisining bashliqi bilen yighin achtuq. yawropa ittipaqigha bu mesilide tejribimiz barliqini bildürdüm. bolupmu, qish pesli éghir bolghan rayonda, kishilerning soghuqtin saqlinishi üchün ewetidighan eshyalirimiz teyyar. biz bu mesilide tereplerning ruxsitini saqlawatimiz» dédi.

u bélarusiyege qanunluq kirgen, emma yawropa barmaqchi bolup bu yerdin polshagha ötmekchi bolghan kishilerge zörür yardemlerni qilishni xalaydighanliqlirini tekitlep: «biz kim bolushidin qetiynezer, ademni adem qatarida körgen bir medeniyetning baliliri.  pütkül insaniyet mushundaq bolushi kérek. bizning qarishimizche, qanunsiz adem yoq, emma biz üchün köchüshke mejburlanghan, qiyinchiliq tüpeylidin öy-makanliridin ayrilishqa mejburlanghan kishiler bar. bu kishiler intayin ajiz, yalghuz we hemmidin bek qoghdashqa mohtaj» dédi.