türkiye iran bilen hemkarliqlirini kücheytishni xalaydu
türkiye tashqi ishlar ministiri mewlüt chawushoghlu türkiyening iran bilen uzun tarixqa ige munasiwetlirini, shundaqla rayon we xelqaraliq mesililerdiki özara hemkarliqlirini tereqqiy qildurushni xalaydighanliqini bildürdi.
türkiye awazi radiyosi xewiri: tashqi ishlar ministiri mewlüt chawushoghlu iran paytexti téhranda, iran tashqi ishlar ministiri hüseyin emir abdullahiyan bilen körüshti we birlikte axbarat élan qilish yighini ötküzdi.
u hürmüzgan ishtatida yüz bergen yer tewreshte jénidin ayrilghanlar üchün sewr tilep, türkiyening qérindash irangha teselliy üchün zörür yardemlerni qilishqa teyyar ikenlikini éytti.
u iran tashqi ishlar ministiri hüseyin emir abdullahiyan bilen birlikte 7-qétimliq aliy derijilik hemkarliq kéngishi yighinining teyyarliqlirini közdin kechürgenliklirini, köch, adem etkeschiliki qatarliq xewpsizlik mesililirinimu muzakire qilghanliqlirini, türkiyening bu mesililerdiki hemkarliqlarni kücheytishni xalaydighanliqini qeyt qildi.
u ikki dölet otturisidiki sodinimu rawajlandurushni xalaydighanliqlirini eskertip, türkiyening barliq munberlerde irangha qarita bir tereplimilik halda yürgüzülüwatqan émbargolarning xata ikenlikini tilgha élip kelgenlikini eskertti.
u mundaq dédi:
«bu wesile bilen, barliq terepler keng dairilik heriket pilanining rolini qaytidin jari qildurush üchün zörür qedemlerni tashlishi kérek, dep oylaymiz. irangha bir tereplimilik halda yürgüzülüwatqan émbargolar emeldin qaldurulushi kérek.»
u ikki dölet jaylashqan rayonda muhim özgirishlerning yüz bergenlikini, rayonluq mesililerde diyalog we özara hemkarliqlarni dawamlashturushning, her daimkidin bek muhim ehmiyetke ige ikenlikini tekitlep: «iran bilen uzun tarixqa ige munasiwetlirimizni, shundaqla rayonluq we xelqaraliq mesililerdiki özara hemkarliqlirimizni tereqqiy qildurushni xalaymiz» dédi.
u ereb birleshme xelipiliki, iran we türkiye otturisidiki tranzit yoligha munasiwetlik bir soalgha: «türkiye bolush süpitimiz bilen, sodini ashuridighan we döletler otturisidiki alaqilerni kücheytidighan her qandaq layihening ichide bolushni xalaymiz, shundaqla qollaymiz» dep jawab berdi.
iran tashqi ishlar ministiri hüseyin emir abdullahiyan türkiye bilen iran otturisida uzun muddetlik hemkarliqlar üchün heriket pilani tüzüsh mesiliside kélishkenliklirini bildürdi.
u türkiye bilen nurghun rayonluq mesililerde pikir birlikige ige ikenliklirini eskertip, mewlüt chawushoghlu bilen rayonluq we xelqaraliq mesililerde bir qétimliq paydiliq körüshüshni emelge ashurghanliqlirini qeyt qildi.
