erdoghan girétsiyening amérikaning bazisigha aylanghanliqini éytti
türkiye jumhur reisi rejep tayyip erdoghan paytext enqerede resmiy dölet ishliri ziyaritide boluwatqan wéngiriye bash ministiri wiktor orban bilen jumhur reislik mehkimiside birlikte axbarat élan qilish yighini ötküzdi.
türkiye awazi radiyosi xewiri: jumhur reis rejep tayyip erdoghan bash ministir wiktor orban bilen xelqaraliq we rayonluq mesililerde özara pikir almashturghanliqlirini bildürüp, ikki terepning soda omumiy sommisini 3 milyard dollardin 6 milyard dollargha chiqirishni nishan qilghanliqlirini éytti.
u: «türkiye-yawropa ittipaqi munasiwetlirining ehmiyitini, bolupmu bizni zörür tépilghanda her daim qollawatqan hörmetlik orbangha, wéngiriyege shexsiy namim we xelqim namidin teshekkür éytimen. yawropa ittipaqigha eza bolush musapiside qilghan küchlük yardemliri üchün her daim esleymen, esleshni dawamlashturimen. qarashlirimizning ittipaqliq ichide chüshinilishi üchün qiliwatqan yardemlirining téximu küchlengen halda dawamlishishini ümid qilimen» dédi.
u girétsiye bash ministiri kiryakos michotakisning bayanatlirini tenqidlep, sözini mundaq dawamlashturdi:
«5 milyongha yéqin musapirni dölitide kütüwatqan, ulargha sahibxanliq qiliwatqan bir döletke <musapirlar mesilisini türkiye keltürüp chiqiriwatidu> déyish, tuzkorluqtur. eger biz ishiklirimizni achidighan bolsaq, girétsiyening néme qilidighanliqini bilmeymen. egede, aqdéngizda musapirlarning yel qolwaqlirini téship, ularni hemmidin köp ölümge ittiriwatqan dölet girétsiye. qolimizda toluq ispat bar. amérika girétsiyening dedeaghach rayonida herbiy baza qurdi. girétsiye hrazir amérikaning bazisigha aylandi.»
bash ministir wiktor orban amérikaning türkiyege köchmenler mesiliside imkaniyetning bériche köp yardem qilishi kéreklikini tekitlidi.
