сулайман сойлу: түркийә дунйа бойичә әң көп инсанпәрвәрлик йардими қилған дөләткә айланди

түркийә авази радийоси хәвири: ички ишлар министири сулайман сойлу әнқәрәниң қизилҗаһаммам районида өткүзүлгән «истратегийәлик тәрәққийат идариси 2021-йиллиқ очуқ ишик тәрбийәләш йиғини» да қилған сөзидә, дунйада турмушниң күнсери мурәккәплишиватқанлиқини, дөләтләр вә шәһәрләрниң, еһтийаҗлар, үмидләр вә тәһдитләрниң көпйиватқанлиқини тәкитләп, күлүмсирәп туридиған йүзләргә, чүшинишлик әқил, аддий - саддилиқ, йахши нийәт вә ишларни асанлаштуридиған кишиләргә илгирики һәрқандақ чағдикидин бәкрәк еһтийаҗлиқ икәнликлирини ейтти.

сулайман сойлу түркийә болуш сүпити билән бу җәһәттә йәлкисидики мәсулийәтләрни ада қилишқа тиришиватқанлиқини әскәртип: «мәмликитимиздә өлүмдин қачқан милйонлиған кишиләргә қучақ ачтуқ. кимниң немә дейишидин қәтийнәзәр, қийинчилиқ вә хираҗәтлири болған тәқдирдиму, бизниң виҗданимиз башқичә һәрикәт қилишимизға йол қоймайду. биз виҗдани ташқа айланған милләт әмәсмиз» деди.

сулайман сойлу һәр йили елан қилинидиған йәршари инсанпәрвәрлик йардәм доклатиға асасланғанда, түркийәниң йеқинқи 4 йилда дөләт кирими нисбитигә селиштурғанда дунйа бойичә әң көп йардәм қилған дөләт болғанлиқини әскәртип, «(түркийә) йәнә йардәм миқдари җәһәттинму америка қошма штатлиридин қалсила иккинчи орунда турди. бу пәқәт иқтисадий күч биләнла мунасивәтлик әмәс, бу бизниң күчимиздин башқа йәнә, инсаний алаһидиликлиримиз биләнму мунасивәтликтур» деди..