türkiye xitayning xewpsizlik kéngishidiki eyibleshlirige qattiq inkas qayturdi
türkiyening birleshken döletler teshkilati (b d t) da turushluq daimiy wekili feridun sinirlioghlu, xitayning b d t da turushluq daimiy wekili géng shuangning eyibleshlirige qattiq inkas qayturdi.
türkiye awazi radiyosi xewiri: türkiyening birleshken döletler teshkilati (b d t) da turushluq daimiy wekili feridun sinirlioghlu, türkiyeni «süriyede kishilik hoquq qanunigha riaye qilish»qa chaqirghan xitayning b d t diki daimiy wekilige inkas qayturup: «biz xelqara kishilik hoquq qanunini we isaniy hoquqni depsende qilghuchilardin sawaq almaymiz» dédi.
xitayning b d t da turushluq daimiy wekili géng shuang, b d t xewpsizlik kéngishining süriyege munasiwetlik yighinida, türkiyeni firat deryasining süyining azlap kétishi bilen allok su bilen teminlesh ornidiki su toxtap kétish ehwalining jawabkari dep körsetti, hemde süriyening sherqiy shimalini ishghal qiliwélish bilen eyibligen türkiyeni xelqara kishilik hoquqqa riaye qilishqa chaqirdi.
türkiyening b d t da turushluq daimiy wekili bash elchi feridun sinirlioghlu, géng shuangning eyiblishige inkas qayturup: «biz xelqara kishilik hoquq qanuni we insaniy hoquqni depsende qilghuchilardin sawaq almaymiz» dédi.
allok su bilen teminlesh ornidiki saqliniwatqan mesililerning sewebining b d t bash katipining doklatida bayan qilinghanliqigha isharet qilghan bash elchi sinirlioghlu, térrorluq teshkilati p k k / y p g bilen süriye hakimiyitining bu mesilini özlirining pilanlirigha xizmet qildurush üchün suyiistémal qilghanliqini eskertti.
u, p k k / y p g ning rayonni muqimsizlashturuwatqan asasliq amil ikenlikini, uning puqralar we türkiyege hujum qiliwatqanliqini tekitlep, buningdin ikki hepte ilgiri afrinda yüz bergen bomba hujumida 6 puqraning qaza qilghanliqini qeyt qildi.
bash elchi sinirlioghlu, p k k / y p g térrorluq teshkilatining iraqtiki süriyelik ezidilerning we süriyelik kurdlarning yurtlirigha qaytishighimu tosqunluq qiliwatqanliqini tekitlidi.
p k k / y p g hujumlirining peqet süriye bilenla cheklinip qalmaydighanliqini tilgha alghan sinirlioghlu, térrorluq teshkilatining süriyediki mewjutluqidin türkiyeni zerbe obyékti qilish üchün paydiliniwatqanliqini bildürdi.
ötken hepte b d t da türkiyeni öz ichige alghan 43 döletning uyghur rayonidiki kishilik hoquq depsendichilikidin endishe qiliwatqanliqini bildürüp birleshme bayanat élan qilishidin kéyin, xitayning b d t xewpsizlik kéngishide tigh uchini türkiyege qaritishi kishilerning diqqitini qozghidi.
