erdoghan baydin bilen f—35 küreshchi ayropilanlar mesilisi toghrisida sözlishidighanliqini bildürdi

türkiye awazi radiyosi xewiri: jumhur reis rejep tayyip erdoghan shotlandiyening glasgow shehiride amérika pirézidénti jo baydin bilen körüshidighanliqini bayan qilip: «bu qétimqi uchrishishimizning eng muhim témisi elwette F-35  (küreshchi ayropilanlar mesilisi) bolidu» dédi.

jumhur reis erdoghan (tünügünki) bir künlük ezerbeyjan ziyaritidin qaytiwétip ayropilanda muxbirlar bilen küntertiptiki mesililer toghrisida söhbetleshti.

erdoghan ziyariti jeryanida ezerbeyjanning (30 yilgha yéqinn dawamlashqan ermen ishghalidin) azad qilinghan yerlerning tereqqiyatigha munasiwetlik xizmetlirini yéqindin közitish, hemde rayonning iqtisadiy yoshurun küchini qézip chiqirish we yéngi qatnash liniyelirige dair paaliyetlerni közdin kechürüsh pursitige ige bolghanliqini éytti.

iranning ezerbeyjanning israiliye bilen bolghan soda hemkarliqigha bildürgen inkasi toghrisida toxtalghan erdoghan, herqaysi döletlerning bir - birining qarar méxanizimigha tesir körsetmesliki kéreklikini tekitlep, iranning bu yerde aqilane heriket qilishini ümid qilidighanliqini tekitlidi.

jumhur reis erdoghan, 10 bash elchining türmidiki osman kawalani qoyup bérish heqqidiki chaqiriqi we uninggha qarita türkiyening bildürgen inkasi toghrisida toxtilip: «biz basqan bu qedem birawgha küch körsitish emes, peqet türkiyede ishlewatqan bash elchilerning türkiyening ichki ishlirigha arilashmasliqini (kapaletlendürüshtur). her qandaq bash elchining özi ishlewatqan döletning ichki ishlirigha arilishish hoquqi yoq» dédi.

erdoghan bu mesile toghrisidiki amérika gézitlirining mawzulirigha baha bérip: «méning kitabimda keynige chékinish yoq» dégenlerni qeyt qildi.

erdoghan amérika pirézidénti baydin bilen glasgowda ötküzidighan uchrishishigha isharet qilip: «elwette, bizning bu uchrishishtiki eng muhim témimiz F-35 mesilisi. F-35 üchün 1 milyard 400 milyon dollar pul töliduq. ular bilen bu pulning bizge qandaq qayturulidighanliqi mesilisini muzakire qilishimiz kérek» dégenlerni qeyt qildi.

amérikaning türkiyege F-16 ayropilani bérishni pilanlawatqanliqi toghrisidiki bir qisim uchurlargha érishkenlikini ipadiligen erdoghan: «biz tapshuruwalghan uchur shuki, ularning bu ish arqiliq (F-35 ning pulini) tölesh pilani bar. bu rastmu yaki emesmu? ulardin sorap bilimiz. eng yuqiri sewiyede, elwette, bu ish toghrisida méning baydin bilen sözlishishim toghra bolidu. ehwal mushundaq bolsa, shuninggha mas halda kélishim hasil qilghan bolimiz» dédi.

erdoghan yene, türkiyening  térrorizmgha qarshi küreshni dölet ichi - sirtida qetiy irade bilen dawamlashturidighanliqini sözlirige ilawe qildi.