aqar nato mudapie ministirliri yighinidin kéyin bayanat berdi

türkiye awazi radiyosi xewiri: türkiye jumhuriyiti dölet mudapie ministiri xulusi aqar amérika qoshma ishtatliridin F-16 urush ayropilani sétiwélishqa munasiwetlik téxnikiliq xizmetlerning bashlanghanliqini bildürdi.

ministir aqar bélgiyening paytexti biryussélda chaqirilghan shimaliy atlantik okyan ehdi teshkilati – nato dölet mudapie ministirliri yighinidin kéyin türkiyening natodiki daimiy wekaletxanisida muxbirlar bilen körüshti.

amérikadin F-16 tipliq urush ayropilani sétiwélishqa munasiwetlik téxnikiliq xizmetlerning bashlanghanliqini tekitligen aqar: «bu jeryanni dawamlashturuwatimiz. türkiyening, türkiye armiyesining küchiyishi nato mudapiesining küchiyishini körsitidu» dédi.

nato merkizide engliye, amérika, girétsiye, ispaniye, polsha, wéngiriye, rominiye, italiye, silowéniye, latwiye we bulghariye dölet mudapie ministirliri bilen qisqa muddetlik uchrishishlarni ötküzüp mudapie we bixeterlik mesililiri boyiche pikir almashturghanliqini bildürgen aqar: «bu uchrishishlarni chöridigen halda aldimizdiki künlerde xizmitimizni dawamlashturimiz» dédi.

aqar süriyening idlib rayonidiki özgirishler heqqide toxtilip: «bizning mewjutluqimiz muhim, bizning u yerdiki mewjutluqimiz hakimiyetning qirghinchiliqining aldini alidu. buning aldini élish dégenlik köchüsh dolquni we radikallishishni toxtitidu» dédi.

ministir aqar, bölgünchi térrorluq teshkilati p k k / y p g ning süriyening shimalida sadir qiliwatqan hujumliri toghrisida toxtilip: «biz bu weqelerni nahayiti yéqindin közitiwatimiz. orni we waqti kelgende qilishqa tégishlik ishlarni qilimiz» dégenlerni qeyt qildi.

aqar, türkiyening girétsiye bilen ege déngizi, sherqiy aqdéngiz we qibrista dawamlishiwatqan mesililerni yaxshi qoshnidarchiliq ramkisi ichide diyalog arqiliq hel qilishni qollaydighanliqini qayta tekitlidi.

buninggha alaqidar uchrishishlarning dawamlishiwatqanliqini, girétsiye mudapie ministiri nikolaos panagiotopulos bilenmu nato merkizide körüshkenlikini bildürgen aqar: «girétsiye mudapie ministiri bilen ijabiy, berpachi uchrishish ötküzduq. bu uchrishishning ijabiy netijilirini aldimizdiki mezgillerde körüshni ümid qilimiz» dédi.

girétsiyening yéqindin buyan qorallinish riqabitige chüshkenlikige isharet qilghan aqar: «bu qedem <türkiyege qarshi emes> déyishiwatidu. undaqta kimge qarshi?» dep naraziliq bildürdi.