tashqi ishlar ministirliqi: türkiye islam düshmenlikige qarshi küreshke bashlamchiliq qiliwatidu
muawin diplomatiye ministiri yawuz sélim qiran türkiyening islam düshmenlikige we her xil ayrimchiliqqa qarshi küreshke bashlamchiliq qiliwatqanliqini éytti.
türkiye awazi radiyosi xewiri: qiran, 2021 – yilliq «< TRT World > munbiri» tor yighinining, «iriqchiliq, medeniyet urushliri we yer shari xaraktérlik siyasetning qutuplishishi» olturushida qilghan sözide, xelqchil siyasiyonlar we taratqularning, ixtiyari yaki ixtiyarsiz halda ayrimchiliq we irqchiliqni ewj alduruwatqanliqini tekitlep mundaq dédi: «jughrapiyemizdiki we bashqa rayonlardiki qutuplishish ehwallirini endishe ichide közitiwatimiz.»
islam düshmenlikining, bügünki kündiki eng köp közge chéliqidighan irqchiliq we chet elliklerge öchmenlik qilish alametlirining biri ikenlikini eskertken qiran, birleshken döletler teshkilati we yawropa kéngishining doklatlirining, islam düshmenlikining dunya miqyasida keng dairilik bir tehditke aylanghanliqini ispatlap bergenlikini tekitlep mundaq dédi: «islam düshmenliki bolupmu yawropada yéqindin buyan barghanséri ewj élip kwtiwatidu.»
musulmanlargha qarshi sözlerning, yawropa éngi we yawropaning musulmanlar dunyasi bilen bolghan munasiwetlirige ziyan yetküzüwatqanliqini bayan qilghan qiran, türkiyening islam düshmenliki we irqchiliqqa qarshi turush kürishining, chet ellerdiki 6 milyon 500 ming puqrasigha biwasite tesir körsitiwatqanliqini eskertip mundaq dédi: «yawropa kéngishi, yawropa bixeterlik we hemkarliq teshkilati, islam hemkarliq teshkilati we birleshken döletler teshkilati qarmiqidiki islam düshmenliki we bashqa her türlük ayrimchiliqqa qarshi küreshke bashlamchiliq qiliwatimiz.»
u yene, qutuplishish we ayrimchiliqni ewj alduruwetken tehditlerge emdi sel qarashqa bolmaydighanliqini, derweqe, bu tehditlerning hem dölet hem xelqara sewiyede jiddiy heriket qollinishni teqezza qilidighanliqinimu sözlirige ilawe qildi.
