әрдоған: биз қолға кәлтүридиған тәрәққийат йашлиримиз үчүн интайин муһим
җумһур рәис рәҗәп таййип әрдоған өзлири қолға кәлтүридиған тәрәққийатниң сүпити, муқимлиқи вә адаләтлик кирим тәқсиматини ишқа ашуруш вә йашларға йеңи хизмәт пурсити йаритип беришниң өзлири үчүн интайин муһим икәнликини ейтти.
түркийә авази радийоси хәвири: җумһур рәис әрдоған, 27 – нөвәтлик 5 - қанун чиқириш йилиниң башлиниши мунасивити билән түркийә бүйүк миллий мәҗлиси омумий кеңишигә хитаб қилди.
нутиқида, йеңи асасий қанун, терроризм, иқтисад, дипломатийә, районлуқ вә хәлқаралиқ мәсилиләр һәққидә тохталған җумһур рәис әрдоған, мундақ деди: «дөлитимизниң сәһийә ул әслиһәлири вә адәм күчи байлиқиға салған мәбләғләрниң мевисини мушундақ кризис мәзгилидә толуқ алғанлиқимиздин интайин хушалмиз. биз қолға кәлтүридиған тәрәққийатниң сүпити, муқимлиқи вә адаләтлик кирим тәқсиматини ишқа ашуруш вә йашларға йеңи хизмәт пурсити йаритип бериш бизгә нисбәтән интайин муһимдур.»
йәр шари характерлик мәсилә болған килимат өзгириши киризиси тоғрилиқму тохталған җумһур рәис әрдоған, мундақ дәп көрсәтти: «париж килимат келишимини парламентқа сунуш қараримиз, биз қозғиған йешил тәрәққийат инқилабиниңму тунҗи хуш хәвиридур.»
у, сүрийә мәсилиси тоғрулуқ қилған сөзидә, хәлқара җәмийәтниң көчмәнләр еқинини башқуруш мәсилисидә қанчилик дәриҗидә аҗизлиқиниң айан болғанлиқини әскәртип мундақ деди: «түркийә өз алдиғила 4 милйон мәзлумни бағриға бесиватқан бир пәйттә, бир қанчә миң мусапирниң алдида алақзадә болуп, инсаний пәзиләттин йирақ позитсийәләрдә болғанларму оттуриға чиқти, бу инсаний пәзиләттин халий позитсийәниң саһиблири йәнә, мусапирларниң һәқ – һоқуқлириға мунасивәтлик бирләшкән дөләтләр тәшкилатиниң қарарлириниму дәпсәндә қилмақта؛ ақдеңизниң қараңға сулирида һәр йили қанчә миң киши үмид сәпиридә һайатидин айриливатқанлиқи тоғрулуқ истатистикилиқ мәлуматлар топлиналмватиду, һалбуки, пәқәт бу мәсилиләрниң өзила виҗданий, әхлақий пәзиләткә игә вә кишиләргә һөрмәт қилидиған җәмийәтләрни һәрикәткә кәлтүрүш үчүн йетәрлик болуши керәк иди.»
