chawushoghlu: «türk dunyasi afghanistandiki özgirishlerning tesirini téximu bek hés qilmaqta»

tashqi ishlar ministiri mewlut chawushoghlu istanbulda jumhur reislik dolmabahche xizmet ishxanisida bashlanghan türk kéngishi tashqi ishlar ministirliri yighinida, afghanistandiki özgirishlerge dair muhim söz qildi.

1710964
chawushoghlu: «türk dunyasi afghanistandiki özgirishlerning tesirini téximu bek hés qilmaqta»

türkiye awazi radiyosi xewiri: tashqi ishlar ministiri mewlut chawushoghlu afghanistangha qoshna, türk dunyasining afghanistandiki özgirishlerning tesirini téximu bek hés qiliwatqanliqini  bildürüp, türk kéngishi tashqi ishlar ministirlirining afghanistan témiliq yighinida ortaq bayanat arqiliq dunyagha küchlük signal bérishining muhimliqini tekitlidi.

afghanistandiki yéngi özgirishler muzakire qilinidighan türk tilda sözlishidighan döletler hemkarliq kéngishi (türk kéngishi) tashqi ishlar ministirliri jiddiy yighini istanbulda jumhur reislik dolmabahche xizmet ishxanisida bashlandi.

mewlut chawushoghlu yighinda sözligen nutuqida, bu yighinning ezerbeyjan erméniye ishghaliyiti astidiki zéminlirini azad qilghan 44 künlük urushning bashlinishining birinchi yilliqigha toghra kelgenliki terepke hemmining diqqitini tartip, «bu munasiwet bilen ezerbeyjanliq qehrimanlirimiznimu öz ichige alghan wetenlirimizning qoghdilishi we musteqilliqi üchün jan pida qilghan barliq shehidlirimizni allahtin rehmet télesh we minnetdarliq bildürüsh bilen esleymiz» dédi.

mewlut chawushoghlu: «afghanistandiki özgirishlerning yershari xaraktérlik tesiri bar. lékin türk dunyasi afghanistanning qoshnisi bolush süpiti bilen  bu özgirishlerning tesirini téximu bek hés qilmaqta we hés qilishni dawamlashturidu. buningdin bashqa yene, afghanistanda milyonlighan türk qérindashlirimizning yashaydighanliqimu biwasite biz köngül bölidighan mesilidur» dédi.

mewlut chawushoghlu bu yighinning öz nöwitide yene, xelqara sehnide türk kéngishining künséri küchiyiwatqan salahiyitining namayendisi bolghanliqini tilgha élip, özlirining türk dunyasining birliki we xelqara mesililerdiki hemkarliqigha dair küchlük signal béridighanliqini bildürdi.



مۇناسىۋەتلىك خەۋەرلەر