ibrahim qalin bilen jéyk sulliwan aqsarayda körüshti

türkiye awazi radiyosi xewiri: jumhur reislik mehkimisi bayanat ishliri ishxanisi yazma bayanat élan qilip, ibrahim qalin bilen jéyk sulliwanning uchrishishida ikki dölet munasiwetliri, yuqumluq késellik we kilimat özgirishi qatarliq mesililer bilen birlikte, afghanistan, süriye, liwiye, qibris, sherqiy aqdéngiz we bashqa rayongha alaqidar mesililer toghrisida sözleshkenlikini uqturdi.

türkiye- amérika munasiwetlirining istratégiyelik ehmiyiti tekitlengen uchrishishta, iqtisadiy hemkarliqni kücheytish yolida tashlinidighan qedemler toghrisida pikir almashturulghanliqi bildürüldi.

ikki dölet soda hejimining pilanlanghan 100 milyard dollargha yétishi üchün zörür bolghan méxanizmlarning heriketke keltürülüshi we özara yuqiri derijilikler ziyaretlirining qoyuqlashturulushi mesilisi nuqtiliq muzakire qilindi.

afghanistanda peyda bolush éhtimali bolghan yéngi insaniy kirizisilerning aldini élish we afghanistangha insanperwer yardemlerning kéchiktürülmestin yetküzülüshi üchün xelqara hemkarliqning shert ikenliki tekitlendi, hemde türkiye bilen amérikaning afghanistangha alaqidar qoyuq alaqisining dawamlishidighanliqi otturigha qoyuldi.

shimaliy atlantik okyan ehdi teshkilati – nato ittipaqdashliri otturisidiki hemkarliqning ehmiyiti tekitlengen uchrishish jeryanida, ittipaqdashlar otturisidiki saqliniwatqan mesililerning söhbet we muzakire yoli bilen hel qilishning zörüriyiti qeyt qilindi.

uchrishishta yene, qarabagh ghelibisidin kéyinki kawkazning weziyiti muhakime qilinip, rayon xaraktérlik tinchliq we muqimliqqa kapaletlik qilish üchün köp yönilishlik tirishchanliqni dawamlashturushning zörüriyiti tekitlendi.