türkiye bilen yawropa ittipaqi otturisida kilimat diyalogi ötküzüldi

türkiye awazi radiyosi xewiri: muhit we sheherchilik ministiri murat kurum bilen yawropa ittipaqi komitétining péshqedem muawin bashliqi frans timmérmans (Frans Timmermans), «kilimat» témiliq yuqiri sewiyelik diyalog ramkisida, bélgiye paytexti biryussélda bir yerge jem boldi.

yawropa komitéti binasida ötküzülgen uchrishish toghrisida élan qilinghan ortaq bayanatta, ministir kurum bilen komitét ezasi timmérmansning karbon bahasini békitish siyasetlirini muzakire qilghanliqi qeyt qilindi.

bayanatta, uchrishishta kilimat özgirishige maslishish, kilimat özgirishi we biologiyelik xilmu xilliqning yoqilishigha qarshi küreshte, tebietni asas qilghan hel qilish chariliridin paydilinishmu küntertipke kelgenliki bildürüldi.

bayanatta, ministir murat kurumning: «türkiye bilen yawropa ittipaqi otturisidiki yuqiri derijilik kilimat diyalogini kilimat özgirishige qarshi küreshte özara hemkarliqlarni kücheytidighan we türkiyening yawropa ittipaqigha qatnishish musapisini qollaydighan chong purset dep qaraymen. türkiye kilimat özgirishige qarshi küreshni siyasettin üstün turidighan mesile dep qarapla qalmastin, belki yene xewpsizlik we tereqqiyat mesilisi depmu qaraydu.  shunga, türkiye kilimat özgirishige qarshi tirishchanliqlirini qetiy dawamlashturmaqta» dégenliki eskertildi.

yawropa ittipaqi komitétining muawin bashliqi frans timmérmans bu yil (2021) yaz, bolupmu aqdéngiz etrapida yüz bergen éghir apetlerning ilmiy sinariyelerning rastliqini körsetkenlikini qeyt qildi.

u yene, barliq döletlerning kilimat mesiliside, derhal heriketke ötüshi we éniq wede bérishige éhtiyajliq ikenliklirini tekitlidi.

uchrishishlarning türkiye bilen yawropa ititipaqi otturisida téxnikiliq sewiyede dawamlishidighanliqi, ministirlarning 2022-yilining béshida weziyetke qarap chiqidighanliqi bildürüldi.