büyük zeper 99 yéshida...
1922-yili 30-awghust «ya musteqilliq ya ölüm» dégen shoar bilen azadliq urushi taj kiydi.
türkiye awazi radiyosi xewiri: mustapa kamal atatürkning rehberlikide qolgha kelgen büyük zeper, tarixqa altun herplirini yazdi. zeper bayrimining 99 yilliqi, memliket miqyasida her xil murasimlar bilen tebriklenmekte. bu murasimlarning birinchisi her qétimqisigha oxshash, atatürk xatire sariyida ötküzüldi.
türkiye jumhur reisi rejep tayyip erdoghan we uning bashchiliqidiki dölet erkanliri atatürk xatire sariyida ötküzülidighan murasimgha ishtirak qildi. her qaysi siyasiy partiye rehberliri, armiye qomandanliri we parlamént ezalirimu murasimgha qatnashti.
rejep tayyip erdoghan atatürkning qebrisige gülchembirek qoyghandin kéyin, hörmette turdi, arqidin istiqlal marshi oquldi. rejep tayyip erdoghan bashchiliqidiki heyet misaqi milliy munarigha ötkendin kéyin, sherep deptirige: «eziz atatürk, musteqilliqimizgha barghan yolning altun halqiliridin büyük zeperning 99 yilliqida, yene bir qétim huzurungizda turuwatimiz. bu tarixiy künde sizni we eziz shéhitlirimizni rehmet bilen yad étimiz. türkiyeni bizge belgilep bergen nishaningiz boyiche parlaq kélechekke yetküzimiz. mudapie sanaitide qolgha keltürgen netijilirimiz bilen, xelqimizning köz qarichuqi bolghan türkiye armiyesining küchini her sahe boyiche ashuruwatimiz. démokratiyede, adalette, heq-hoquq we erkinliklerde emelge ashurulghan islahatlar bilen, jumhuriyitimizni téximu küchlendürimiz. amanitingiz bolghan türkiye jumhuriyiti bixeter qollarda. rohingiz shad bolsun» dep béghishlima yazdi.
istanbuldimu zeper bayrimi munasiwiti bilen, taksim meydanidiki jumhuriyet xatire munari aldida murasim ötküzüldi. munargha, istanbul waliy mehkimisi, 1-armiye qomandanliq ishtabi we istanbul sheherlik hökümiti gülchembirek qoydi.
rejep tayip erdoghan atatürk xatire sariyidiki murasimdin kéyin, bash qomandan süpitide jumhur reisik sariyida tebriklerni qobul qilidu.
zeper bayrimining 99 yilliqi munasiwiti bilen, paytext enqerede resmiy parat ötküzülidu. türkiye büyük millet mejlisi (parlaménti) aldidin bashlinidighan parat, kona parlamént binasi aldida axrlishidu.
