түркийә сүрийәдики б д т вәкиллирини инсанпәрвәрлик мәсилилиридә пиринсипал болушқа чақирди

түркийә авази радийоси хәвири: түркийә җумһурийити ташқи ишлар министирлиқи байанатчиси, баш әлчи танҗу билгич, алдинқи күни б д т ниң дәмәшиқтә даимий турушлуқ кординатори вә инсанпәрвәрлик маслаштурғучиси, б д т ниң сүрийә киризиси районлуқ инсанпәрвәрлик маслаштурғучиси вә б д т балилар йардәм фондиниң оттура шәрқ вә шималий африқа районлуқ директори тәрипидин елан қилинған бирләшмә байанаттики хаталиқлар, толуқсиз вә қаймуқтурғучи учурларға ишарәт қилип, бу хил мәсилиләрдә сәзгүр болушни тәләп қилди.

билгич бу һәқтики соалға йазма җаваб қайтуруп, түркийәниң сүрийәниң инсанпәрвәрлик вәзийити тоғрисида б д т билән қәрәллик алақилишиватқанлиқини байан қилип: «шундақ болушиға қаримай, б д т ниң дәмәшқтә даимий турушлуқ маслаштурғучиси вә инсанпәрвәрлик маслаштурғучиси, б д т районлуқ инсанпәрвәрлик маслаштурғучиси, сүрийә киризиси вә б д т балилар параванлиқ фондиниң оттура шәрқ вә шималий африқа районлуқ директори тәрипидин елан қилинған 2021- йили 7- айниң 15- күнидики бирләшмә байанатида мадди хаталиқ, толуқ болмиған вә қаймуқтурғучи учурлар бар» деди.

билгич аллуқ су понкитиниң рәсуләйнгә йеқин сүрийә өктичилириниң контроллуқидики районға җайлашқанлиқини вә ток билән ишләйдиғанлиқини әслитип өтти.

билгич, мәзкур понкит билән рәсуләйн вә тәлабйад райониниң бирдинбир ток мәнбәсиниң болса, җәнубта икәнликини көрситип: «терорлуқ тәшкилати п к к / п й д вә һакимийәт аллуқ су понкити вә районға баридиған токни қәстән тохтитишқа урунмақта. ток үзүлүп қелиш әһваллири понкитниң су билән тәминлишини йоққа чиқирип, райондики инсанпәрвәрлик шараитини мурәккәпләштүрүвәтмәктә» дегәнләрни қәйт қилди.

у, рәсуләйн вә тел абйад районида 18 – апрел, аллуқ су понкитида болса, 26 – ийундин буйан бу сәвәбтин електер енергийәсиниң мәвҗут әмәсликини оттуриға қойуп: «шуниңдәк һакимийәт баб райониниң ичимлик ​​вә деһқанчилиқ сүйи билән тәминлинишигә халиғанчә тосқунлуқ қилмақта» деди.

бирләшмә байанатқа имза қойғучиларниң сүрийәдики инсанпәрвәрлик мәсилилиригә таллап позитсийә билдүргәнлики вә ковид – 19 йуқуми мәзгилидә өктичиләрниң контроллуқида йашайдиған нәччә йүзмиңлиған пуқраниң ток вә судин қәстән мәһрум қилинишиниң еғир ақивәтлиригә сәл қариғанлиқиға ишарәт қилған билгич, сөзини давамлаштуруп: «биз б д т ниң райондики вәкиллиригә мәсилиләрни пиринсипал, тәрәпсиз вә мустәқил бир тәрәп қилиш керәкликини әскәртимиз» деди.