türkiye b d t xewpsizlik kéngishining jilwegözü chégra éghizi qararini memnunluq bilen qarshi aldi
birleshken döletler teshkilati xewpsizlik kéngishi xataydiki jilwegözü chégra éghizigha b d t yardemliri üchün hoquq bérish qararining mudditini 12 ay uzartti.
türkiye awazi radiyosi xewiri: türkiye bu qararni memnunluq bilen qarshi alidighanliqini élan qildi.
tashqi ishlar ministirliqining yazma bayanatida, b d t ning 12 ay üchün maqullighan qararining deslepki 6 aydin kéyin, b d t bash katipining doklatigha asasen 6 ay qoshumche qilinip, yolgha qoyulidighanliqi bildürüldi.
jilwegözü chégra éghizining muhimliqini tekitlengen bayanatta mundaq yene déyildi:
«mezkur chégra éghizimiz arqiliq ewetilgen b d t yardimi süriyediki insanperwerlik krizisigha ünümlük taqabil turushning dawami shundaqla rayonning muqimliqi we bixeterliki üchün intayin muhim. shunglashqa süriye xelqining éhtiyajini qandurush üchün dölitimiz arqiliq paaliyet qiliwatqan b d t chégra halqighan insanperwerlik yardem méxanizmining dawamlishishini qarshi alimiz. b d t xewpsizlik kéngishi we nuqtiliq xelqaraliq aktiyorlarning ijabiy we yarashturush pozitsiyesining, bolupmu siyasiy hel qilish musapisini we süriye krizisige nisbeten menggülük hel qilish charisi tépishni meqset qilghan xelqaraliq tirishchanliqlar nuqtisidin otturigha qoyushini ümid qilimiz»
bayanatta yene: «türkiye süriyediki insanperwerlik krizisqa qarshi küreshke qaratqan küchlük yardimini dawamlashturidu. urush toxtitishni qoghdash we siyasiy hel qilish musapisini ilgiri sürüshke dawamliq aktip töhpe qoshidu» déyildi.
b d t xewpsizlik kéngishide chaqirilghan yépiq yighinda, süriyening gherbiy shimalidiki 5 milyon kishige insanperwerlik yardem yetküzüshte intayin muhim bolghan jilwegözü chégra éghizining yene bir yil ochuq tutulishi birdek awaz bilen qobul qilinghan idi.
2020-yilghiche ochuq bolghan 4 chégra éghizi ichide jilwegözü chégra éghizi bügünki kündimu birdin bir ochuq chégra éghizi bolush süpiti bilen zor ehmiyetke ige.
