erdoghan ezerbeyjan parlaméntigha xitab qildi

jumhur reis rejep tayyip erdoghan ezerbeyjan parlaméntigha xitab qilip «barliq imkaniyetlirimiz bilen bügünkige oxshashla buningdin kéyinmu dawamliq ezerbeyjanning yénidin orun alimiz» dédi.

1659315
erdoghan ezerbeyjan parlaméntigha xitab qildi

türkiye awazi radiyosi xewiri: jumhur reis erdoghan, ezerbeyjan parlaméntigha qilghan xitabida, türkiyening barliq imkaniyetliri bilen bügünkige oxshashla buningdin kéyinmu ezerbeyjanning yénidin orun alidighanliqini tekitlep mundaq dédi: «kawkaz rayonidiki tinchliq we huzurdin peqet ezerbeyjanla emes, erméniyeni öz ichige alghan barliq rayon döletliri, pütkül dunya behrimen bolidu, uzaq mezgillik tinchliq menzilgahigha élip baridighan yolning, rayondiki barliq xelqler, döletler özara ishench asasida ishqa ashuridighan hemkarliqtin ötidighanliqigha ishinimiz. bügün biz barliq imkaniyetlirimiz bilen ezerbeyjanning yénidimiz, pütkül dunya shuni bilsunki, biz etimu, ögünmu, jümlidin buningdin kéyinmu ezerbeyjanning yénida bolimiz. türkiye xelqige éytip tügetküsiz bohtanlarni chaplighanlar aldi bilen kawkaz rayonigha, ezerbeyjangha nezer tashlishi kérek. andin wijdanliri yoqap ketmigen bolsa, ular oydurup chiqarghan böhtanliri heqqide ular bilen ayrim muzakire élip bararmiz. medeniyet bilen buzghunchiliq otturisidiki  perqni körüshni xalaydighanlar, kelsun, qarabaghdiki ikki dewr otturisidiki perqke nezer tashlisun.»

bu yil (2021) ezerbeyjanning medeniyet paytexti bolghan shushani kéler yilimu «türk dunyasining medeniyet paytexti» süpitide körüshni chin dilidin arzu qilidighanliqlirini éytqan jumhur reis erdoghan, mundaq dep körsetti: «qarabagh zepiridin héchkim biaramliq hés qilmsun, chünki bu zeper, weyranchiliqning emes, awatchiliqning, zulumning emes, adaletning zepiridur. shuni alahide tekitlep ötimenki, qarabagh dunyani özlirining siyasiy we iqtisadiy arzu - armanlirining meydani dep qaraydighanlarning pilanliri buzulghan jaydur. kawkaz rayonining boynigha asaret késhenlirini salalmasliqi üchün, aldimizgha chiqqan pursetlerdin hemmimiz birlikte, eng yaxshi shekilde paydilinishimiz lazim. nexchiwan bilen bakuni bir - birige tutashturidighan <zéngézur karidori> ning rayonimizgha élip kélidighan huzur – halawet hem bayliqni til bilen teswirlep bergili bolmaydu.  <zéngézur karidori> diki tömür yoli arqiliq ermenlermu qolay halda moskwagha we dunyagha baralaydu, bu arqiliq ular öz – özige séliwatqan qamal iskenjisidinmu xalas tapalaydu. axirida shuni alahide eskertip ötimenki, erméniye ezerbeyjan bilen saqliniwatqan mesililerni hel qilghanséri, türkiye döliti bolush süpitimiz bilen bizmu tégishlik qedemlerni tashlaymiz.»

rejep tayyip erdoghan ezerbeyjan parlaméntidiki nutuqidin kéyin, bakudiki türkiye-ezerbeyjan shéhitzarliqini ziyaret qilip, qelempur qoydi we shéhitlarning rohigha dua qildi.

u arqidin bakuda chüshken méhmansarayda ezerbeyjan wezipe guruppisidiki eskerlerni qobul qildi.



مۇناسىۋەتلىك خەۋەرلەر