dölet bixeterlik orgini daéshning atalmish mesulini türkiyege keltürdi
türkiye dölet bixeterlik orgini (MİT) térrorluq teshkilati daéshning atalmish «türkiye wilayiti mesuli» qasim gülerni süriyede ishqa ashurghan axturush – tutush herikiti dawamida qolgha chüshürüp türkiyege keltürdi.
türkiye awazi radiyosi xewiri: dölet xewpsizliki ishliri menbelirining bildürüshiche, türkiye dölet bixeterlik orgini, «qizil renglik tutush buyruqi chiqirilghan térrorchilar» katégoriyesidin orun alghan térrorluq teshkilati daéshning atalmish «türkiye wilayiti mesuli» ebu usame ettürki texellusluq qasim gülerning, süriyedin türkiyege qanunsiz yollar bilen ötüp, térrorluq hujumliri élip bérishni pilanlawatqanliqidin xewer tapqandin kéyin, derhal heriketke ötken.
izigha chüshülgen güler, süriyede ishqa ashurulghan axturush - tutush herikiti dawamida qolgha chüshürülgendin kéyin, soraq qilinish üchün türkiyege keltürülgen.
gülerning qoral – yaragh we partlatquchlar bilen qanunsiz yollar bilen türkiyege ötüshke teyyarliniwatqanliqi éniqlap chiqilghan.
«qizil renglik tutush buyruqi chiqirilghan térrorchilar» katégoriyeside izigha chüshülüp tutulghan tunji daésh mensubi ikenliki bildürülgen qasim gülerdin köp sanda daéshqa ait höjjetler we mexpiy melumatlarmu qolgha chüshürülgen.
gülerning 2008 – 2010 – yilliri afghanistan – pakistan rayonigha ötüp, toqunush saheliride paaliyet élip barghanliqi, 2014 – yili daéshning sépige qétilghanliqi éniqlap chiqilghan.
daésh qarmiqida yuqiri derijilik wezipilerni ötigen qasim gülerning, daéshning atalmish rusiye, yawropa we türkiye maliye ishliri mesuli bolghanliqimu otturigha chiqqan.
