shentop pakistan pirézidénti teripidin qobul qilindi

türkiye awazi radiyosi xewiri: iqtisadiy hemkarliq teshkilati parlamént ezaliri birleshmisining 2 – nöwetlik «rayonluq bir gewdilishish üchün parlaméntlar ara hemkarliqni qollash» témiliq omumiy yighinigha qatnishish üchün pakistanda ziyarette boluwatqan türkiye büyük millet mejlisi bashliqi mustafa shentop, paytext islababadta pakistan pirézidénti arif alwi teripidin qobul qilindi.

uchrishishta, islam elliri duch kéliwatqan mesililerni öz ichige alghan ikki dölet otturisidiki munasiwetler we dunyagha tesir körsitiwatqan «kowid – 19» yuqumi heqqide muzakire élip bérildi.

türkiye büyük millet mejlisi bashliqi mustafa shentop, pakistan – türkiye munasiwetliri heqqide toxtilip mundaq dédi: «döletlirimiz we xelqlirimiz  otturisidiki bu özgiche munasiwetler, musheqqetlik zamanlarda we milliy dawalirimizda bir – birimizni qollash arqiliqmu  ispatlanghan munasiwetlerdur. xelqlirimizning wekilliri bolghan parlaméntliriiz otturisidiki munasiwetlerningmu özara hemkarliq we sistémiliq uchur - alaqe yolliri arqiliq téximu tereqqiy qildurulushi ortaq nishanimizdur.»

türkiye bilen pakistanning «kowid – 19» yuqumigha qarshi küreshte hemkarliq ornitish arqiliqmu bashqa döletlerge ülge bolghanliqini eskertken shentop, «kowid – 19» yuqumining hem sehiye sahesidiki hemde iqtisadiy jehettiki selbiy netijilirini yoqitish üchün dawamliq tirishchanliq körsitiliwatqanliqini tekitlidi.

pakistan pirézidénti alwi bolsa, türkiye bilen pakistanning ismi oxshash bolmisimu , lékin eslide bir dölet ikenlikini, jümlidin ikki döletning tarixiy munasiwetlerge ige ikenlikini, musteqilliq urushida lahor meydanida toplanghan yardemlerning  özara munasiwetlerning eng roshen namayendiliridin biri ikenlikini qeyt qildi.

barghanséri ewj élip kétiwatqan islam düshmenlikige qarshi küresh mesiliside dunyagha heqiqiy islamni tonushturushning zörürlükini tekitligen alwi, mundaq dep körsetti: «türkiye bilen pakistan birlikte islam dunyasigha rehberlik qilishi kérek.»