әрдоған партийәсиниң қурултийида муһим сөз қилди

җумһур рәис, қошумчә адаләт вә тәрәққийат партийәси рәиси рәҗәп таййип әрдоған, 21 – әсир вә униңдин һалқиған җәрйанларни өз ичигә алидиған шәкилдә чоң вә күчлүк түркийә бәрпа қуруп чиққанлиқлирини ейтти.

1607603
әрдоған партийәсиниң қурултийида муһим сөз қилди

түркийә авази радийоси хәвири: җумһур рәис әрдоған, партийәсиниң әнқәрәдә өткүзүлгән чоң қурултийида сөз қилип, түркийәни алди билән (җумһурийәт қурулғанлиқиниң 100 - йили болған) 2023- йиллиқ нишаниға, андин 2053- йиллиқ нишаниға (милләтчи һәрикәт партийәиси билән бирликтә қурған) җумһур иттипақи билән бирликтә йәткүзидиғанлиқини билдүрди.

түркийә вә түрк хәлқини изчил һалда өзиниң ички аваригәрчилики билән мәшғул қилип қойуш арқилиқ йеқинқи икки әсирниң мабәйнидә гәвдилик өзгиришләрниң сиртида қалдуруп қойғанларниң һазирму охшаш ойунни ойнашниң койида икәнликини, әмма уларниң бу қетим мувәппәқийәт қазиналмайдиғанлиқини тәкитлигән әрдоған: «чүнки, бу қетим пәрқлиқ бир түркийә бар. 84 милйон пуқраси өзини бир милләт дәп атаватқан бир түркийә бар. бу қетим, пәқәт илкидикләргә игә чиқиш биләнла болди қилмайдиған, дунйаниң сийасий вә иқтисадий системисидики өзигә лайиқ орнини қолға кәлтүрүш ирадисини 2023  -  вә 2053 - йиллиқ нишанлири вә 2071  - йиллиқ ғайилири арқилиқ намайан қилған бир түркийә бар. йеқинқи сәккиз йилниң мабәйнидә қурулған тузақларни бир – бирләп вәйран қилған бир түркийә бар. қоллиридин кәлсә, йамғур йеғиватқан пәйттиму түркийәгә бир пийалә су бәрмәйдиғанларниң һәр күни алдимизға йеңи мәсилиләрни теңиш билән чиқишлири бизни йолимиздин қайтуралмиди. йәнә қайтуралмайду» дегәнләрни қәйт қилди.

2023- йил нишанлирини йеңи башлинишқа айландуруп, 21- әсирни вә униңдин һалқиған заманларни өз ичигә алидиған бүйүк вә күчлүк түркийә қуруп чиққанлиқлирини билдүргән әрдоған, адаләт вә тәрәққийат партийәсиниң түркийәни маариптин сағламлиққичә, санаәттин тәнтәрбийәгичә болған саһәләргә салған селинмилар арқилиқ тәрәққий қилдурғанлиқини тилға елип өтти.

әрдоған, бөлгүнчи террорлуқ тәшкилати п к к ни өз ичигә барлиқ террорлуқ тәшкилатлирини мәғлубийәткә учритип, дөләт чегралири ичидә һәрикәт қилалмайдиған һалға чүшүрүп қойғанлиқлирини тәкитлиди.

қатнаш саһәсигә 932 милйард түрк лираси мәбләғ селиш арқилиқ түркийәниң ул әслиһәлирини йеңилап тәрәққий қилдурғанлиқлириға ишарәт қилған әрдоған, ковид – 19 йуқуми сәвәбидин турғунлуқ басқучиға кирип қалған болсиму, түркийәниң, келәчәкниң әң чоң авийатсийә қатниши ул әслиһәсигә игә дөлити болуш сүпити билән дунйада биринчи орунда туридиғанлиқи әскәртти.



مۇناسىۋەتلىك خەۋەرلەر