erdoghan garadiki térrorluq hujumini chöridigen halda muhim söz qildi

türkiye awazi radiyosi xewiri: jumhur reis rejep tayyip erdoghan, bölgünchi térrorluq teshkilati p k k ning iraqning shimalidiki gara rayonida türkiye puqrasi 13 kishini shéhit qilishigha süküt qilghan amérika qoshma ishtatlirigha naraziliq bildürüp: «bolang – talanggha yol yoq, eger siler bilen dunyada, shimaliy atlantik okyan ehdi teshkilati – natoda ittipaqdashliqni dawamlashturidighan bolsaq, térrorchilarning yénida turmaysiler» dédi.

jumhur reis, qoshumche adalet we tereqqiyat partiyesi reisi erdoghan partiyesining rize yenishehir yépiq tenterbiye zalida ötküzülgen 7 – nöwetlik rize qurultiyigha qatnashti.

erdoghan bölgünchi térrorluq teshkilati p k k ning 13 türkiye puqrasining shéhit qilinishigha süküt qilghan amérikagha naraziliq bildürüp: «bulang – talanggha yol yoq, eger siler bilen dunyada, shimaliy atlantik okyan ehdi teshkilati – natoda ittipaqdashliqni dawamlashturidighan bolsaq, térrorchilarning yénida turmaysiler. siler p k k ning, y p g ning, p y d ning sépide turmayttinglarghu? siler ularning sépide we arqisida turuwatisiler . bu bigunahlarning qéni térrorluq teshkilatigha ige chiqqan, qollighan we ulargha hésdashliq qilghan barliq kishilerning qoligha chachridi. térrorluq teshkilatlirining teshwiqat sahesidiki ijtimaiy taratqu mensupliri, hemminglar  bigunah, qoralsiz 13 kishining peskeshlerche öltürülüshining jawabkarisiler» dédi.

jumhur reis erdoghan garadiki «bürküt penchisi – 2» herikiti toghrisida toxtilip: «birinchi qedemde ularning barliq uwiliri, öngkürliri we panahlinish orunlirigha kirimiz dégeniduq, 42 térrorchi bu esnada ujuqturuldi. yilséri tereqqiy qiliwatqan türkiye armiyesige taqabil turalaydighan ne bir térrorluq teshkilati, ne bir pichka küch yoq. eskerlirimizning aldigha chiqalmighan térrorluq teshkilatining — epsuski — peskeshlikte chek – chégrasi yoq. bular pesla emes, azgaldur» dégen ibarilerni ishletti.

erdoghan türkiye armiyesidin pexirlinidighanliqini bayan qilip: «armiyemizning zaman we makan cheklimisige qarimastin, dölitimiz éhtiyajliq bolghan we xelqimizning mewjutluqi üchün muhim bolghan her xil heriketlerni öz imkaniyetlirige tayinip élip baralaydighan sewiyege yetkenlikidin pexirlinimiz» dégenlerni qeyt qildi.

u sözi esnasida bölgünchi térrorluq teshkilati p k k ning puqralar qetliamliri toghrisida toxtilip: «p k k térrorluq teshkilatining puqralar qetliamlirini kitablashturidighan bolsaq, gherbliklerning shanliq énsiklopédiyelirining hejimidin éship kétidu» dédi.

«térrorluq teshkilatining béshini pütünley izip tashlash bizning burchimizgha aylandi» dégen jumhur reis erdoghan, sözini dawamlashturup: «garadiki qirghinchiliqtin kéyin héchqandaq dölet, teshkilat, qurulma we shexs türkiyening iraq we süriyediki heriketlirining toghra – xataliqini detalash qilalmaydu. iraq merkiziy we rayonluq hökümet bilen térrorluq teshkilatini pütünley yoqitip tashlash mesiliside hempikirmiz. pulini tüligen hemmila adem ishliteleydighan yallanma qatillar padisigha aylanghan p k k ning eng axirqi ezasi bir terep qilinip bolghuche küreshni dawamlashturimiz. biz kéchilerning biride tuyuqsiz térrorchilarning üstige mingüdek küch, wasite we iradige igimiz. qandil, sinjar we süriyediki her qandaq yer térrorchilar üchün bixeter emes.

men térrorluq teshkilati p k k ichidiki aldanghan yashlargha chaqiriq qilimen, kélinglar, bu yallanma qatillar topidin baldurraq qutulunglar. türkiye jumhuriyiti döliti, semimiy pushayman qilip özige murajiet qilghan her bir puqragha yaxshi muamile qilidu» dédi.

erdoghan: «buningdin kéyin, hemmeylenning aldida ikki xil yol bar. ya türkiye bilen birlikte amansiz, lékinsiz, emmasiz halette térrorluqqa qarshi küresh qilish meydanini ipadileydu, yaki bu qoli qanliq térrorluq teshkilatining her bir jinayitining shériki bolup, hem öz wijdanigha hemde xelqara munberlerde hésabini béridu» dégenlerni sözlirige ilawe qildi.