chawushoghlu: amérika CAATS émbargoliri mesiliside ortaq xizmet guruppisi teklipi sundi
tashqi ishlar ministiri mewlüt chawushoghlu amérika qoshma ishtatlirining türkiyege qaratqan CAATS (amérikaning düshmenlirige émbargolar arqiliq küresh qilish qanuni) émbargoliri mesiliside ortaq xizmet guruppisi teshkil qilish teklipi sunghanliqini éytti.
türkiye awazi radiyosi xewiri: chawushoghlu, «2020 – yilliq diplomatiye siyasitige nezer» namliq yighinda qilghan sözide, amérika qoshma ishtatlirining rusiyedin «400 - s» bashqurulidighan bomba mudapie sistémisi sétiwalghan türkiyege qarita émbargo yürgüzüsh toghruluq qarar chiqarghanliqini, hemde bu émbargolar mesiliside türkiyege ortaq xizmet ishlesh guruppisi teshkil qilish teklipi sunghanliqini tekitlep mundaq dédi: «2020 – yilimu eng muhim küntertip maddilirimizdin biri diplomatiye boldi, emma kirizis diplomatiye arqiliq hel qilghili bolmaydighan derijide bérip yetken chaghda, sahede heriketke öttuq, tekrar diyalog we diplomatiyening derwazisini keng achtuq. jümlidin, sherqiy aqdéngizda biz bolmisaq, heriket qilishning mumkin bolmaydighanliqini pütkül jahangha namayen qilduq. qandaq qilalaydighanliqimizni - qudritimizni dostmu, düshmenmu tonup yetti.»
türkiye – yawropa ittipaqi munasiwetliri toghriliqmu toxtalghan chawushoghlu, mundaq dep körsetti: «yéngi yilda yawropa ittipaqi bilen bolghan munasiwetlirimizning téximu ijabiy muhit astida dawamlashturulushi üchün biz teyyarmiz. yawropa ittipaqiningmu teyyar bolushini kütüwatimiz.»
