چاۋۇشئوغلۇ گىرېتسىيە تاشقى ئىشلار مىنىستىرىغا جاۋاب قايتۇردى
تاشقى ئىشلار مىنىستىرى مەۋلۈت چاۋۇشئوغلۇ گىرېتسىيە دىپلوماتىيە مىنىستىرى نىكوس دېندىئاسغا جاۋاب قايتۇردى.
تۈركىيە ئاۋازى رادىيوسى خەۋىرى: چاۋۇشئوغلۇ، ئاممىۋى ئورتاقلىشىش تور بېتى Twitter سەھىپىسىدە، گىرېتسىيە دىپلوماتىيە مىنىستىرى نىكوس دېندىئاسغا قايتۇرغان جاۋابىدا، مۇنداق دېدى: «ھۆرمەتلىك نىكوس ئەپەندىم! يېڭى يىل ئۈچۈن سىزگە دوستانە تەۋسىيە: باشقىلاردىن ياردەم تەلەپ قىلىش ۋە گىرېتسىيە خەلقىنىڭ ئېتىبارىغا زىيان يەتكۈزۈشتىن ۋاز كېچىڭ. 2021 – يىلى، بىۋاسىتە، سەمىمى ۋە جىددىي سۆھبەت ئېلىپ بېرىپ، ئىختىلاپلىرىمىزنى ئادىل بىر شەكىلدە مۇزاكىرە قىلالايدىغان بىر يىل بولسۇن.»
گىرېتسىيە دىپلوماتىيە مىنىستىرى نىكوس دېندىئاس، ئاممىۋى ئورتاقلىشىش تور بېتىدىكى سەھىپىسىدە، ياۋروپا ئەللىرىنىڭ تۈركىيەگە قورال – ياراغ ئېمبارگوسى يۈرگۈزۈش مەسىلىسىنى قانچىلىغان قېتىم ياۋروپا ئىتتىپاقىنىڭ كۈنتەرتىپىگە ئېلىپ كىرگەنلىكىنى ئىلگىرى سۈرۈپ، مۇنداق دېگەنىدى: «ئامېرىكا قوشما ئىشتاتلىرى شىمالىي ئاتلانتىك ئەھدى تەشكىلاتىنىڭ پۈتۈنلۈكىگە بۇزغۇنچىلىق قىلغانلىقى سەۋەبلىك تۈركىيەگە ئېمبارگو يۈرگۈزدى.»
