шәнтоп вә фуат октай әзәрбәйҗанниң зәпәр күнини тәбриклиди
түркийә бүйүк милләт мәҗлиси (парламенти) башлиқи мустафа шәнтоп әзәрбәйҗанниң «зәпәр күни» мунасивити билән тәбрик телеграммиси елан қилди.
түркийә авази радийоси хәвири: түркийә бүйүк милләт мәҗлиси башлиқи мустафа шәнтоп твиттерда һәмбәһрлигән учурида: «бир вәтән һәрикитидә зор ғәлибиләрни қолға кәлтүргән җан әзәрбәйҗанниң зәпәр күнини тәбрикләймиз. қарабағда әзәрбәйҗан түрклириниң байриқини есиш, зулум вә ишғалийәтни ахирлаштуруш үчүн шаһадәт ичишкә йүгүргән 2 миң 783 қәһриманимизға аллаһтин рәһмәт тиләймиз. йашисун икки дөләт, бир милләт» деди.
у һәмбәһирлигән учуриға, түркийә җумһур рәиси рәҗәп таййип әрдоған билән әзәрбәйҗан пирезиденти илһам әлийевниң, әрменийәниң ишғалийити астидики әзәрбәйҗан земинлириниң азад қилинғанлиқи мунасивити билән бакудики даңлиқ азадлиқ мәйданида өткүзүлгән зәпәр паратида тартилған бир фотографни қойди.
муавин җумһур рәис фуат октайму әрменийәниң ишғалийити астидики әзәрбәйҗан земинлириниң азад қилинғанлиқи мунасивити билән өткүзүлгән зәпәр паратини тәбрикләп, твиттерда учур һәмбәһирлиди.
у: «44 күн давамлашқан вәтән урушида ғәлибә қилип, аридин 30 йил өткәндә қарабағни қайта вәтән қойниға қайтуруп кәлгән қәһриман әзәрбәйҗан армийәсини вә зәпәр күнини тәбрикләймән. түркийә болуш сүпитимиз билән, бундин кейинму пүткүл имканийәтлиримиз билән җан әзәрбәйҗанни давамлиқ қоллаймиз» деди.
